من گەلەك زەحمەت دیتیە هەتا گەهشتیمە ڤی ئاستی
سندس سالح سلێڤانەیی:
مەدیاكار (هۆزان عەبدوللا یوسف) د دیدارەكێ دا بۆ رۆژناما ئەڤرۆ گۆت: دەستپێكا كارێ من یێ راگەهاندنێ ڤەدگەڕیت بۆ سالا 2013 و پێنگاڤا ئێكێ من ژ تەلەفزیۆنا وار دەستپێكر، وەك نڤیسەرا دەنگوباسان، پشتی شەش هەیڤان هاتمە ڤەگوهاستن بۆ پشكا پرۆدیۆسەریا دەنگوباسێن سیاسی وەك هاریكار من كاردكر، پشتی سالەكێ پرۆدیۆسەرا سەرەكی، هەروەسا بۆ دەمێ سالەكێ ژی من ل رۆژناما ئەڤرۆ كاركریە، هەروەسا من ل رادیۆیا وار و نوكە ژی من سازیا گاڤ كاركریە، هەروەسا ب دەهان گۆتار ل رۆژنامە و گۆڤاران بەلاڤكرینە.
هەروەسا گۆت: ئەز هەلگرا باوەرنامەیا ماستەرێ مە ب زانستێن چاندنێ، لێ ژبەر حەزا من بۆ كارێ راگەهاندنێ وەكریە كو ئەز یا بەردەوامبم، بۆ زانین وەك كچەك من گەلەك زەحمەت دیتیە هەتا گەهشتیمە ڤێ ئاستی و خۆشحالم كو دشێم ب رێیا راگەهاندنێ خزمەتا خەلكێ مە بكەم و ئێش و ئازارێن وان بگەهینمە جهێن شۆلەژێ و ئەز ڤێ چەندێ ب كارەكێ پیرۆز دزانم، بۆ زانین ئەو كارێن ئەز هەردەم شانازیێ پێ دبەم رێكخستنا خولەكێ بوو بۆ رۆژنامەڤانێن ژن ل دهۆكێ، ب رێكا سەنتەرێ خواندنێن یەكسانیا جێندەری بۆ (20) رۆژنامەڤان.
