حه‌مید ئیسماعیل: دووراتییا ڕێکێ كارتێكرنێ ل سه‌ر ئاست و ئه‌نجامێن مه دكه‌ت
عەلی حاجی:
د داخویانیەکێ دا سەرپەرشتێ تیما فوتبۆلا یانه‌یا زاخۆ بۆ رۆژنامەیا ئەڤرۆ دیار كر تیما وان پتری هەموو یانەیێن دیتر د خولێ دا هاتن و چوونێ دکەت و زه‌ره‌مه‌نده و گەلەک جاران ژبەر ماندیبونێ ژی یاریزان ئاستێ پێدڤی پێشکێش ناکەن.
زێدەتر حەمید ئیسماعیل گۆت: د وەرزێ نوو یێ خولا ستێرێن ئیراقێ یا فوتبۆلێ دا د ناڤبەرا هەر دو یاریان دا سێ رۆژن و ئەڤ چەندە ژی گەلەک یا کێمە بۆ تیما مە ژبەر کو ب ڤی ڕەنگی یاریزانێن مە گەلەک د ماندی دبن و گەلەک جاران ژبەر وێ ماندیبوونێ ژی یاریزان ئاستێ پێدڤی پێشکێش ناکەن ب ڕەنگەکێ گەلەک جاران یاریزان د تڕۆمبێلێ دا بەرهەڤیان بۆ یاریێ دکەن، ئەڤ چەندە ژی دبیتە گڤاشتن ل سەر تیمێ و خالان ژ دەست دەین، زاخۆ دوورترین باژێرە د ئیراقێ دا ئەم زێدەترین هاتن و چوونێ دکەین و پتریا دەمێن مە ژی دناڤ تڕۆمبێلێ دانە، پێدڤیە فدراسیۆنا فوتبۆلا ئیراقێ هزر د ڤی بابەتی دا بکەت و ڤی بابەتی چارەسەر بکەت و هەتا یاریزان ب خوە ژی گازندە ل سەر ڤێ چەندێ هەنە.
ناڤبری گۆت ژی: تیما مە شیانێن پێشکێشکرنا ئاستەکێ باشتر هەیە و دێ دەمەک نێزیک ژی دا ڤەگەرین ل سەر ئاستێ خوە یێ راستەقینە و پشت راستین ژی تیما مە ب ڤی ڕەنگی نامینیت و مه باوه‌رییا هه‌یی بۆ یاریێن بهێت هه‌موو یاریزان دێ شێن ئاست و ئه‌نجامێن دلخوه‌شكه‌ر بۆ جه‌ماوه‌رێ یانه‌یێ پێشكێشكه‌ن.
