ئەڤرۆ ئینتەر و ئارسنال د یارییەكا ئاگرین دا و بەرشلۆنا بەرانبەر ئەركەكێ ب سانەهی دا یە
هەر ئەڤرۆ ژی بڕیارە نەهـ یاریێن دی ژ چارچووڤەیێ گەڕا چارێ یا قارەمانییا یانەیێن ئۆرۆپا قارەمانێن خولا ب ناڤكری چامپیۆنز لیگ یا فوتبۆلێ بهێنە ئەنجامدان، ئەوا دهێتە پێشبینیكرن پشتەڤانێن وەرزشی ل پرانییا وەلاتێن جیهانێ چاڤ ل هندە یاریێن ئاگرین بن و ئەوێن بڤی رەنگی دێ هێنە ئەنجامدان.
ئاستۆن ڤێلا چاڤ ل پاراستنا رێزبەندیا خوەیە
ل دووڤ خشتەیێ یاریێن ئەڤرۆ هاتینە بەلاڤركرن بڕیارە دو یاری ژ گەڕا چارێ ل دەمژمێر 8:45 شەڤ بڤی شێوەیی بهێنە كرن، یانەیا ئاستۆن ڤێلا یا ئنگلتەرایێ وەكو ئێك ژ سۆپرایزێن چامپیۆنزێ دێ بیتە مێڤانا یانەیا كلۆپ برۆچ یا بەلجیكی د یارییەكا هەستیار دا بۆ خودانێن ئەردی و گرنگ دا بۆ خودانا سەرێ لیستێ ئاستۆن ڤێلا ئەوا ژ سێ یاریێن بۆری سێ سەركەفتن ئیناین ئێك ژوانا ل سەر بایرن میونخ یا ئەلمانی ب گۆلەكێ كو دبیتە سۆپرازەك نەهـ خال كۆمكرینە و سەرێ لیستێ دهێت، یانەیا كلۆپ برۆچ بتنێ ئێك سەركەفتن و دو خوسارەتی هەنە ل رێزا 26ێ دهێت، ئەڤ یارییە بۆ ئاستۆن ڤێلا یا گرنگە پێخەمەت پاراستنا سەرێ لیستێ، یارییا دویێ دناڤبەرا خودانێن ئەردی یانەیا شاختار دۆنێتسك یا ئۆكراینی و یانەیا یۆنگ بۆیز یا سویسری یە، دبیت ئەڤ یارییە وەكو ئاست و هەڤڕكی یا هەڤسەنگ بیت، ژبەركو هەردو یانەیان چ سەركەفتن نینن، شاختارك بتنێ وەكهەڤییەك هەیە رێزا 29ێ دهێت و یۆنگ بۆیز بێ خالە رێزا 34ێ دهێت.
پشكا دویێ یا یاریێن ئەڤ شەڤە ئاگرینن
بڕیارە ل دەمژمێر 11 شەڤ حەفت یاریێن مایی ژ هەڤڕكیێن چامپیۆنز یێن ئەڤرۆ ل یاریگەهێن جودا بهێنە ئەنجامدان، ژ گرنترین یاریێن ئەڤرۆ یانەیا ئارسنال یا ئنگلتەرایێ دێ بیتە مێڤانا ئینتەر میلان یا ئیتالی د یارییەكا ب هێز و ئاگرین دایە بۆ هەردو تیمان، خودانێن ئەردی دو سەركەفتن و وەكهەڤییەك یا هەیی ب حەفت خالان رێزا حەفتێ دهێت، لێ یانەیا ئارسنال هەمان خال هەنە كێمترییا دو گۆلان رێزا نەهێ دهێت، ئانكو یارییەكا ب سانەهی نابیت و دێ یا شەڕی بیت بۆ رێزێن پێشێ و باشتر.
بایرن د ئەركەكێ ب زەحمەت دا و یا بەرشەلۆنا ب
بایرن د ئەركەكێ ب زەحمەت دا و بۆ بەرشەلۆنا ب سانەهی یە
دو یاریێن دی یێن جودا بۆ یانەیێن مەزن ب زەحمەت و لایەكێ دی ب سانەهی بیت، یانەیا بایرن میونخ یا ئەلمانی دێ دناڤ ئەرد و پشتەڤانێن خوە مێڤاندارییا یانەیا یەنفیا یا پۆرتۆگالی كەت ئێك ژ یاریێن ب هێز د یاریێن ئەڤ شەڤە دا، بایرن میونخ ل سەركەفتنا دگەڕیت ژبۆ پێشڤەچوون بەر ب رێزێن پێشیێ ئەوا نوكە ب تنێ سێ خال كۆمكرین و دو خوسارەتی یێن هەین رێزا 23ێ دهێت، دێ بزاڤێ كەت ڤەگەڕیتە سەركەفتنا و جەماوەرێ خوە ئاشت كەت، لێ یانەیا مێڤان یا ب سانەهی نابیت ئەوا شەش خال ژ دو سەركەفتنا ئیناین و رێزا 13ێ دهێت، ژلایێ خوەڤە یانەیا بەرشەلۆنا یا ئسپانی د بیت د گەشتەكا خوەش دابیت دەمێ ل دبیتە مێڤانا یانەیا سرڤینا زڤیردا یا سربی، یانەیا كاتەلۆنی دو سەركەفتن هەنە رێزا 10ێ دهێت، لێ سرڤینایێ بێ سەركەفتنە و چ خال نینن رێزا 33ێ دهێت.
پاریس سانجێرمان و ئەتلەتیكۆ مەدرید شەڕێ خالان و دیرۆكی یە
یارییەكا دی یا گرنگ ژ چارچووڤەیێ هەڤڕكیێن ئەڤ شەڤە دا دێ دناڤبەرا هەردو چەمسەران بیت یانەیا پاریس سانجێرمان یا فرەنسی و ئەتلەتیكۆ مەدرید یا ئسپانی، هەردو یانە د خولێن خوە دا هەڤڕكێن هەرە ب هێزن لێ د چامپیۆنزێ دا كاودانێن وان د باش نینن، یانەیا فرەنسی چ سێ یارییان سەركەفتنە و وەكهەڤیەك هەیە لێ ئەتلەتیكۆ ب تنێ ئێك سەركەفتن هەیە، دیرۆك دناڤبەرا وان دا ب تنێ دو جاران بوویە سەركەفتنەك بۆ پاریسێ و وەكهەڤییەك هاتیە، ل دووڤ دەنگۆباسان یانەیا ئەتلەتیك دێ ب چەنكێ شكەستی یاریێ كەت پشتی هنگاڤتنا پێنچ یاریزانێن وێ ئەوژی، ماركۆس یۆرینتی، سیزار ئازبیلیكۆیتا، تۆماس لیمار، روبن لو نورماند و خۆسێ ماریا خیمینێز ژبەر كارتێن زەر.
سێ یاریێن دی سەنگا وان كێمتر نینە ژ یاریێن ئەڤ شەڤە
ئەو یاریێن مایی د ئەڤ شەڤە دا بهێنە كرن بڤی رەنگی نە، یانەیا شتۆتگارد یا ئەلمانی دێ ل یاریگەها خوە مێڤاندارییا ئاتلانتا كەت، رێدبۆل سالزبۆرگ یا نەمسایی دێ بیتە مێڤانا یانەیا ڤاینۆرد رۆتردام یا هۆلەندی، سپارتا براگ یا چیكی دێ مێڤاندارییا ستاد برێست یا فرەنسی كەت.
لیستەیا گشتی بۆ هەر 36 یانەیان هاتیە دانان
هەر 36 یانەیێن پشكدار ل سەر چار ئاستێن جودا و دووڤ پلەكرنا وەرزێ بۆری هاتبوونە بەلاڤكرن ئەوا پۆلینكرن ژلایێ فیدراسیۆنا فوتبۆلا ئۆرۆپا هاتیە دانان، یاریێن وان ب شێوەیێ خول ئێك قۆناغ دهێنە كرن، هەر تیمەك دێ هەشت یارییان كەت، چار یاری د ناڤ ئەردێ خوە دا و چار ژ دەرڤەیی یاریگەهێ، ل دووماهیێ دێ رێزبەندی بۆ هەر36 تیمان د ئێك لیستە دا هێتە دانان، ئەو تیمێن ل رێزا ئێكێ هەتا هەشتێ ئێكسەر دێ دەربازبنە قۆناغا 16ێ، ئەو یانەیێن رێزا نەهێ هەتا 24ێ دێ یاریێن خوە ب شێوەیێ دو گەڕ ئەنجامدەن ژبۆ دەربازبوونا هەشت تیمێن دی بۆ قۆناغا 16ێ، لێ ئەو یانەیێن رێزا 25 هەتا 36ێ دێ ژ قارەمانیێ هێنە دوورئێخستن.
ئەلمانییا دێ یارییا دووماهیێ مێڤان كەت
بۆ زانین د قۆناغا 16ێ دا دێ شێوازێ هاتنۆچوون دناڤبەرا یانەیان هێتە كرن هەتا دگەهیتە یارییا دووماهیێ، بڕیارە یاریێن ئێكێ ل 17ێ هەتا 19ێ ئەیلۆنا بهێت دەستپێكەت، یاریێن دویێ ل ئێك و دو یا چرییا ئێكێ هێنە كرن، ل 22و 23ێ هەمان مەهـ یاریێن گەڕا سێیێ نە، دێ بەردەوامبن هەتا یارییا دووماهیێ ل 31ێ ئەیارا سالا 2025ێ ل یاریگەها ئالیانز ئارینا یا بایرن میۆنخ وەلاتێ ئەلمانییا هێتە كرن.
