ئه‌ڤرۆ دێ په‌رده ل سه‌ر وه‌رزێ نوو یێ خولا نایابا كوردستانێ هێته ڕاكرن
بڕیاره ئه‌ڤرۆ ب فه‌رمی په‌رده ل سه‌ر وه‌رزێ نوو 2024-2025 یا خولا پلا نایابا كوردستانێ بۆ یارییا فوتبۆلێ ب ئه‌نجامدانا سێ یارییان بهێته ڕاكرن، ئه‌وا دهێته هژمارتن وه‌رزێ 17ێ، ئێكه‌م وه‌رز ل 2006-2007ێ بوو ئه‌وا یانه‌یا دهۆك ناسناڤێ وێ ب ده‌ستڤه ئینابوو، دووماهی ناسناڤ یا وه‌رزێ بۆری یانه‌یا ئاكرێ بوو قاره‌مانا خولێ.
ئه‌ڤرۆ سێ یاری نه
ب پشكدارییا 16 یانه‌یێن هه‌رێما كوردستانێ چاڤه‌ڕێ دهێته كرن ئه‌ڤرۆ سێ یار ژ هه‌ڤڕكیێن گه‌ڕا ئێكێ كو دبیته ده‌ستپێكا وه‌رزێ نوو ل ده‌مژمێر دو پشتی نیڤرۆ بڤی شێوه‌یێ بهێنه ئه‌نجامدان، یانه‌یا شه‌قلاوه ل یاریگه‌ها خوه دێ مێڤاندارییا یانه‌یا پێشمه‌رگه‌یا هه‌ولێرێ كه‌ت، ژلایێ خوه‌ڤه یانه‌یا پێشه‌سازی ئه‌وا بۆ جارا ئێكێ یه هاتییه پلا نایاب ل پارێزگه‌ها سلێمانیێ بیته مێڤانا ده‌ربه‌ندیخان، هه‌ر ل سلێمانیێ یانه‌یا هندرین مێڤانا شێروانه‌یه.
ئاكرێ دێ پێنگاڤا ئێكێ بۆ پاراستنا ناسناڤی خوه كه‌ت
بڕیاره سوبه‌هی رۆژا ئه‌ینی یانه‌یا ئاكرێ قاره‌مانا وه‌رزێ بۆری د ناڤ ئه‌رد و جه‌ماوه‌رێ خوه دا مێڤانا یانه‌یا چوارقۆرنه بكه‌ت ب هیڤیێن ده‌ستپێكه‌كا نوو به‌ر ب پاراستنا ناسناڤێ خوه، ژلایێ خوه‌ڤه یانه‌یا زاخۆ دێ ل هه‌ولێرا پایته‌خت بیته مێڤانا یانه‌یا ڕزگاری كو ئه‌ڤ یانه ژی مێڤانا نوویه د خولێ دا، هه‌روه‌سان ڕانیه دێ برایه‌تی مێڤان كه‌ت.
چاڤه‌ڕێ دهێته كرن ل شه‌مبییا بهێت گه‌ڕا ئێكێ یا خولا پلا نایاب ب ئه‌نجامدانا دو یارییان ب دووماهی بهێت ئه‌وژی دناڤبه‌را خودانێن ئه‌ردی سه‌یدسادق و مێڤانا وێ یانه‌یا هه‌ولێر، هه‌روه‌سان ئارارات ل باژێرێ سلێمانیێ بیته مێڤانا سیروانی نوو، بۆ زانین هه‌موو یاریێن گه‌ڕا ئێكێ دێ ل ده‌مژمێر دو پشتی نیڤرۆ هێنه كرن.
بۆ زانین تیما یانه‌یا دهۆك ل وه‌رزێ بۆری د خولا پلا نایاب دا پشكداربوو لێ پشتی ل رێزا 15ێ و به‌ری دووماهیێ هاتی ل دووڤ ڕێنمایێن فدراسیۆنا فوتبۆلا كوردستانێ پاشڤه‌چوو پلا ئێك بۆ وه‌رزێ ئه‌ڤ ساله كو دبیته جارا سێیێ دناڤا خولا پلا ئێك دا پشتی ل وه‌رزێ 2011-2012 و 2017-2018ێ پشكداری كری و د هه‌ردو پشكداریێن خوه دا وه‌كو قاره‌مانا خولێ ڤه‌گه‌ڕیا پلا نایاب.
