د كۆپا كەنداڤی دا … دهۆك ب خالەكا گرنگ ژ عومانێ ڤەگەڕیا
قەیس وەیس:
تیما فوتبۆلا یانەیا دهۆك ب خالەكا گرنگ ژ یاریگەها ستادیۆما ئەلسەعادە ل باژێرێ سلالە ڤەگەڕیا، پشتی دگەل خودانێن ئەرد و جەماوەری یانەیا زەفار یا عومانی ب گۆلەكێ وەكهەڤبووین، د یارییا واندا ئەوا ل شەڤا دەربازبووی ژ چارچووڤەیێ گەڕا دویێ یا كۆما ئێكێ ژ هەڤڕكیێن قارەمانییا كۆپا كەنداڤی هاتییە كرن.
دنیڤا ئێكێ دا یاریزانێن دهۆكێ ئەو ئاستێ پێدڤی و چاڤەڕێ كری نیشان نەدا و كەفتنە د كۆمەكا خەلەتییان دا، د بەرانبەر دا یاریزانێن یانەیا زەفار شیان مفایی ژ خەلەتیێن وان وەربگرن و پڕانییا دەمی كونترۆلا یاریگەهێ بكەن، د خەلەتییا ئێكێ دا دادڤانێ یاریێ پەنەلتییە بۆ خودانێن ئەردی هژمارتن ئەوا د خولەكا هەشتێ دا هاتییە لێدان لێ یاریزانێ زەفار یێ نێجیری چێرل ئۆلیسیما سەركەفتی نەبوو، گڤاشتنێن تیما عومانی د بەردەوامبوون و شیان مفایی ژ خەلەتیەكا دی یا گۆلپارێزێ دهۆكێ بینن و پەنەلتییا دویێ بۆ وان بهێتە هژمارتن، ئەڤچارە شیان ب سەركەفتیانە گۆلا پێشكەفتنێ بینن د خولەكا 22ێ دا ژلایێ یاریزانێ خوە عەلی سالم ئەلنەهار گۆلێ تۆماربكەت، ئەڤ نیڤە ب پێشكەفتنا زەفار ب گۆلەكێ ب دووماهی هات.
د نیڤا دویێ دا ئاستێ یاریێ هاتە گوهۆڕین و یاریزانێن دهۆكێ شیان لڤینەكا باش ل سەر گۆلا زەفار بكەن تایبەت پشتی گوهۆڕینێن راهێنەرێ تیمێ مەسعۆد دەمیرال كرن ژبۆ بهێزكرنا هێلا هێرشبرنێ، ئاستێ یاریێ بەر ب هەڤڕكییا تۆماركرنا گۆلێ چوو یاریزانێن دهۆكێ گڤاشتنەكا مەزن ل سەر گۆلا زەفار كرن و شیان دەرئەنجامێ وێ گۆلا وەكهەڤیێ بینت ئەوا ژلایێ هێرشبەرێ وێ ئەلشەرقی ئەلبەحری د خولەكا 75 دا بینن، پشتی ڤێ گۆلێ ئاستێ یاریێ بهێزتر لێهات و هەردو تیما بزاڤێن گۆلا پێشكەفتنێ دكرن
بۆ زانین قارەمانا كۆپا كەنداڤی دێ سێ ملیۆن دۆلاران وەرگریت، خودانا رێزا دویێ دێ ئێك ملیۆن دۆلاران وەرگریت، باشترین یاریزانێ كۆپا دێ 50 هزار دۆلاران وەرگریت، باشترین گۆلپارێز دێ خەلاتێ 50 هزار دۆلاران وەرگریت، گۆلكەرێ قارەمانیێ ژی دێ 50 هزار دۆلاران وەرگریت.
هەروەسان هەر یانەكا پشكدار دێ سێ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ- چارگۆشەیا زێرین- دێ 100 هزار دۆلار بۆ هێنە دان، دیسان ئەو یانەیا گەشتەكێ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ بینت ژی 30 هزار دۆلار هاتینە دانان.
چەند یانە پشكدارن و یاریێن بهێت یێن دهۆكێ كەنگی نە
بۆ وەرزێ نوو بڕیارە هەشت یانە پشكداریێ تێدا بكەن ئەوێن هاتینە بەلاڤكرن ل سەر دو كۆمان، یاریێن وان دێ ب شێوەیێ خول دو قۆناغ هێنە ئەنجامدان و بەردەوامبن هەتا 25ێ نیسانا سالا 2025ێ، تیما فوتبۆلا یانەیا دهۆك نوونەرا هەرێما كوردستانێ و ئیراقێ یە و كەڤتییە د كۆما دویێ دا.
كۆما ئێكێ: دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی.
كۆما دویێ: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی.
ل دووڤ لیستەیا یاریێن تیما یانەیا دهۆك د كۆپا كەنداڤی دێ بڤی شێوەی.
یارییا سێیێ 27-11- 2024 ل دەمژمێر حەفتی شەڤ مێڤاندارییا نەسر یا ئیماراتی كەت.
یارییا چارێ كۆ دبیتە قۆناغا دویێ ژ كۆمێ دێ ل 3-12- 2024 بیتە مێڤانا نەسر یا ئیماراتی.
یارییا پێنجێ ل 4-2-2024 دێ بەر ب وەلاتێ یەمەن چیت و بیتە مێڤانا یانەیا ئەهلی سەنعا یا عومانی كەت.
یارییا پێنجێ و یا دووماهیێ ژ قۆناغا كۆمان دێ ل 19-2-2024ێ مێڤاندارییا یانەیا زەفار یا عومانی كەت كو دێ ل دەمژمێر حەفتی شەڤ هێتە ئەنجامدان.
