گه‌له‌ك هونه‌رمه‌ندێن شێوه‌كار ل سه‌ر ئێك ستایل ماینه و خوه نه‌گوهۆڕیه
هه‌رهین محه‌مه‌د:
هونه‌رمه‌ندێ شێوه‌كار هه‌ژار محه‌مه‌د د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: كه‌ڤالێن من ده‌ربرینێ ژ ژیواری دكه‌ت، چونكو قوتابخانا من ژیواریه و من ئه‌و هه‌لبژارتیه و ژیوار ئانكو شێوازێ ریالیزم هه‌ر تشته‌كێ مرۆڤ دبینت ئه‌وی دروست دكه‌ت، به‌لێ هنده‌ك هونه‌رمه‌ندێن دی هنده‌ك قوتابخانه و شێوازێن دی د هه‌لبژێرن و ئه‌وان پتر ده‌ربرین یا تێدا و دبیت زه‌حمه‌ت تربیت و نه‌شێم بێژم دچه‌ند رۆژان دا كه‌ڤالی ب دووماهی دئینم هه‌كه كه‌ڤالی گه‌له‌ك كار یێ تێدا گه‌له‌ك ده‌م بۆ دڤێت و ب گشتی هه‌كه پوترێته‌ك بیت دسێ ده‌مژمێران دا ب دووماهی دئینم.
ناڤهاتی گۆت: گه‌له‌ك هونه‌رمه‌ند هه‌نه و ل سه‌ر ئێك ستایل ماینه و گوهورین ل سه‌ر خوه و كارێ خوه نه‌كرینه و به‌روڤاژی مه هونه‌رمه‌ندێن شێوه‌كار یێن گه‌نجن هه‌نه پێشكه‌فتنه‌كا گه‌له‌كا باش بخوه ڤه دیتیه و ئه‌ڤ چه‌نده ژی ل سه‌ر كه‌سایه‌تیا شێوه‌كاری دمینت كا دشیانێت ئه‌وی دایه خوه ب گوهوریت، یان نه و ئه‌ز بخوه گه‌له‌ك چاڤدێریا هونه‌رمه‌ندێن بیانی دكه‌م و گه‌له‌ك جاران (ته‌قلیدا)وان دكه‌من ئانكو هزره‌كێ ژوان وه‌ردگرم نه‌كو ته‌قلیدا كارێ وان دكه‌م و نمایشدكه‌م.
هه‌ژاری گۆت ژی: ره‌خنێ ل چو شێوه‌كاران ناگرم و هه‌ركه‌سه‌ك یێ ئازاده ب چ شێوه كاربكه‌ت ویێ به‌رده‌وام بیتن، به‌لێ ئه‌م ل جهه‌كی نه كارێ هونه‌ری و هونه‌رمه‌ندی پێدڤی ب مادی هه‌یه و دبیت ب ئه‌وی كارێ شێوه‌كار دكه‌ت چو داهات بۆ نه‌هێت ل وی ده‌می دێ نه‌چار بیت چیت كاره‌كێ دی كه‌ت و ده‌ستخوشی ل گه‌له‌ك هونه‌رمه‌ندێن كوردستانێ دكوم ب تایبه‌تی هونه‌رمه‌ند(خه‌یری ئاده‌م) گه‌له‌ك ئه‌كادیمی یه و پتریا به‌رهه‌مێن وی یێن هونه‌ری ل ده‌رڤه‌ی وه‌لاتی هاتینه نیشاندان و ژبه‌ر هندێ گه‌له‌ك داغبارێ ئه‌وی و كارێن وی یێن سه‌ركه‌فتی مه.
