زەلال و لارا دێ بزاڤێن دەربازبوونێ بۆ كۆپا جیهانی كەن
قەیس وەیس:
ب نوونەراتییا دو یاریزان و راهێنەرێ یانەیا دهۆك بڕیارە هەلبژارتیێ ئیراقێ بۆ یارییا تێنسا ئەردی ل سەر ئاستێ كچان پشكداری د ڤاڤارتنێن كێشوەرێ ئاسیا دەربازبوون بۆ مۆندیالا جیهانی 2025ێ ئەوا بڕیارە ڤاڤارتن ل پایتەختێ بەحرێنێ مەنامە ل دووماهییا حەفتییا بهێت دەسپێبكەن.
سەعید خەلیل ئەندامێ فدراسیۆنا تێنسا ئەردی یا ئیراقێ و سەرۆك شاندێ هەلبژارتیێ ئیراقێ بۆ رۆژنامەیا ئەڤرۆ دیار كر ل ئێك شەمبییا بۆری شاندێ هەلبژارتیێ ئیراقێ ب پشكدارییا چار یاریزانێن كچ گەهشتنە پایتەختێ بەحرێنێ مەنانە ئەو ژی زەلال سەعید و لارا ئاڤدەل ژ پارێزگەها دهۆكێ و نور زیاد و شۆغر راڤی دگەل راهێنەرێ وان یێ یانەیا دهۆك ئاڤدەل حەسەن، خوە بەرهەڤكرن بۆ ڤاڤارتنێن كێشوەرێ ئاسیا ئەوا دێ ل 23ێ ڤێ مەهێ هێنە كرن كو دێ بزاڤێن دەربازبوون بۆ مۆندیالا جیهانی كەن( پلەی چین كینگ)، بۆ ماوەیێ حەفتیەكێ دێ دناڤا كەمپەكێ ڕاهێنانێ یێ گرتی دابن ژبۆ باشترین بەرهەڤی بۆ ڤاڤارتنان.
هەروەسان ناڤهاتی ئەوێ هەمان دەم دا سەرۆكێ فدراسیۆنا تێنسا ئەردییە ل دهۆكێ گۆت: وەكو یاریزانێن دهۆكێ و ڕاهێنەرێ وان مە باوەرییەكا باش پێ هەیە دێ شێن باشترین شێوە پشكداریێ كەن و هەردو یاریزانێن دی ژی خودان شیانن، لێ یا سرۆشتی یە هندەك وەلات هەنە زێدەتر ژ وەلاتێ ئیراقێ بۆ ڤێ یاریێ یا پێشكەفتییە و ئاستێن بلند هەنە، لەوما ژی ئەركێ یاریزانێن مە ب سانەهی نابیت، ب هیڤییا وێ یەكێ كچێن مە بشێن ئەو ئاستێ پێدڤی و ئارمانج و هیڤیێن مە ب جهبینن ئەو ژی ب دەستڤە ئینانا پلێتا دەربازبوونێ بۆ مۆندیالا جیهانی.
ژلایەكێ دووڤە سەعید خەلیل هەبوونا هەردو یاریزانێن كچ یێن پارێزگەها دهۆكێ دناڤ هەلبژارتیێ ئیراقێ دا ب باشترین بەلگە دانا كو كچێن دهۆكێ خودان شیان هەكە پشتەڤانی بۆ هەبیت و هیڤی خواست جهێن پەیوەندیدار پشتەڤانییا وان و یاریزانێن كوڕ بكەن ژبەركو ئاستێ وان چ كێمتر نینە ژ یێن ئیراقی هەكە باشتر نەبیت.
