ناجی حەسەن: ژبەر پشتەڤانییا من بۆ مافێن دادڤانێن پارێزگەهێ هاتمە سزادان
لژنەیا دیسپیلینێ ل فدراسیۆنا فوتبۆلا ئیراقێ ب فەرمی ناجی حەسەن هەلسەنگینەرەكێ یاریێن خولا ئیراقێ كو دادڤانەكێ پێشتر یێ پارێزگەها دهۆكێ بۆ ماوەیێ سێ هەیڤان ل سەر كارێ وی دوورئێخستن، ل سەر سكالایا ڕێڤەبەرییا دادڤانێن ئیراقێ بەرانبەر بەلاڤكرنا پۆستەكی دناڤ لاپەرێ خوە یێ كەسایەتی د تۆڕا چڤاكی دا كو ڕێڤەبەرییا دادڤانان كارێ خوە دروستی نا كەن.
ل دور ڤێ یەكێ ناجی حەسەن بۆ رۆژنامەیا ئەڤرۆ راستییا بابەتی دیار كر و گۆت: ئەڤە بوو ماوەیێ هەشت سالە وەكو هەلسەنگینەرێ دادڤانانا و یارییان د خولێن ئیراقێ دا بڕێڤە دبەم، وەكو ئێك ژ ئەوان دادڤانێن سەركەفتی د خولێ دا بوویمە، لڤێ دووماهیێ ڕێڤەبەرییا دادڤانێن ئیراقێ كارەكێ دروست ب ڕێڤە نەدبر ئانكو جوداهی دناڤبەرا دادڤانێن كوردستانێ و ئیراقێ دا كرن تایبەت یێن كورد و عەرەب، وەرزێ ئەڤ سالە ژی ئەڤ جوداهییە یا بەردەوام بوو، لەوما ژی وەكو ئێك ژ هەلسەنگێنەرەك چەندین جاران من داخوازا یەكسابوونێ دناڤبەرا هەموو دادڤانان دكر لێ بێ مفا بوو، هەروەسان فدراسیۆنا فوتبۆلا پارێزگەهێ ژی نە شیایە بەرەڤانیێ ژ دادڤانێن مە بكەت سەرباری ئەوێ غەدرا لێ دهێتە كرن و ئەڤە ژی بوو جهێ نەڕازیبوونا دادڤانان.
هەروەسان ناڤهاتی ئەوچەندە ژی دیار كر ژبەر ئەوێ نەحەقییا بەردەوام نەچاربووم ل سەر تۆرێن چڤاكی ژی بەحسی مافێ دادڤانێن پارێزگەها دهۆكێ بكەم و بێژم ئەڤ ڕێڤەبەرییە یا نە دادپەروەرە د كارێ خوە دا، لەوما ژی ل سەر سكالایا وان ئەز بۆ ماوەیێ سێ هەیڤان هاتیمە ڕاوەستاندن، دێ دۆڤچوونا بابەتی كەم ب هیڤییا وێ یەكێ پشتەڤانی ژی بۆ مە بهێتە كرن.
