پێژنا سیبەرەكێ
بلند محەمەد
تە، ئەو دەستێ جلكا و كراسكێ سپی یێ گولگولی، ل سەر وێ تربا سار دانا، بێهنەكا خۆش ل هنداڤ راوەستیایی. تە جانتكا خوە ڤەكر و قۆدیكەكا شیری ژ ناڤ هینا دەر. تە ئەو قۆدیك ب سینگێ خوەڤە گڤاشت و هەناسەیەكا كوور ل گەل كێشا و ماچەك پێڤە نەخشاند.
وێ كێلیكێ، تو د چاڤێن من دا كۆمتلەكێ دلۆڤانیێ بوویی. من چەند ئەڤ دیمەنێ دوبارە كری ددیت، بۆ من جهێ حێبەتیێ بوو. من هەر بۆ خوە دگۆت: ئایا ئەڤ هەموو ماندی بوونە و هاتنوچۆنە بۆچی؟ دانانا ڤان تشتا و قودیكێن شیری ل سەر ڤێ تربێ چ دگەهینت؟.
تە، ب كراسكێ خوە یێ ڕەش، ئەو كۆلانكا درێژا بۆ سەر جاددەیا گشتی دچۆ دبڕی. من تو دیتی، تو ل ترۆمبێلەكا سپی سوار بوویی. ژ باژێڕی ڤارێ بوویی، لێ من قەت هزر نەكر كیڤە غەوارە بوویی.
-جیران چەوانی؟
تە ب حێبەتی ڤە بەرسڤا من دا. دبت ئەو جارا ئێكێ بوو من پرسیارا رەوشا تە كری. تە هەموو نیشانێن حێبەتیێ ل دۆر من نەخشەكرن. تنێ ب سەرێ لێڤا تە گۆت: باشم.
ئەو ملدەفێ خەلیجیێ ڕەش، بەژنا تە یا زراڤ پێچا بوو. تو كر بوویە گلۆلكەكا هریا مەرەزی، لێ دەبارا تە د وێ وەرپێچانێ دا نە دهات. تە بۆ خوە دگۆت: من حەفت سالان حەزكرن ل گەل پسمامەكێ خوە هەبوو، حەفت سالێن ڕەبەق من ڤیان گەل كر. حەفت سالێن حەزكرن و لێكگوهەرتنا دلینی و دلۆڤانیێ بوون. حەفت سالێن هشكاتیێ نەبوون، بەلكۆ حەفت سالێن ب زاخ و ئارامیا جانی بوون.
د وان حەفت سالان دا، دەزیێ داویێ ژ ڤێ هەموو حەفحەفێ ئەو بوو، ل گەل خۆشتڤیترین مرۆڤ بژیم. ژ جان و رحا وی من زاڕۆكەك هەبت، تنێ زاڕۆكەك، چونكۆ من دزانی ئەو دێ من و وی بۆ هەتا هەتایێ پێكڤە گرێدەت. هەتا پشتی مرنا مە ژی دێ هەر ب هەبوونا وی زاڕۆكی ل گەل ئێك مینین.
نوكە ئەز یا ل گەل كەسەكێ دی دژیم، یێ بۆ من نەنیاسە. ب جان و رحا خوە یێ نەنیاسە. هێشتا من نەشیایە وی وەكو جان وەرگرم. هەر ژ رۆژا ئێكێ و هەتا نوكە، وی وەكو لەشفرۆشەكێ لەشێ من یێ بۆ خوە كڕی. هەستەكێ نامۆ من بەرامبەر وی هەیە. ئەو نەشیایە ببتە جهێ ئەڤینا من یا ئێكێ. چ جارا من هەست پێ نەكریە ئەو بۆ ئێك چركە ژی یێ دناڤ رحا من دا دژیت. ئەڤ پەیوەندیە بۆ من جهێ حێبەتیێ بوو. لێ ژ نەچاری مرۆڤ دبێژتە یارێ دایكا خوە ژی بابۆ. نۆكە من دڤێت من زاڕۆكەك هەبت. هەست پێ ناكەم دێ ژ ڤی كەسێ بیانی بت یێ تنێ بۆ من بوویە مێر، نەكو بوویە هەڤپشكێ ژیانێ. ئەو زارۆكە دێ ژ ناڤ رحا من هێتە دەر و دێ یێ ژ بێهنا ئەڤینێ باركری بت. هۆسا دێ شێم هەموو ڤیانا خوە ب دەمە وی زاڕۆكی یا من نەشیایی بدەمە پسمامێ خوە.
