یاریزانێن یانەیا ئافرەتێن دهۆكێ هەلبژارتیێ ئیراقێ پەنجەمۆر كریە
چاڤەڕێ دهێتە كرن هەلبژارتیێ ئیراقێ ل سەر ئاستێ كچان بۆ یارییا فوتسالێ بەر ب وەلاتێ مەغرب بچن بۆ دانانا كەمپەكێ راهێنانێ خوە بەرهەڤكرن بۆ ڤاڤارتنێن كۆپا ئاسیا ئەوا بڕیارە هەڤڕكیێن وان ل دەستپێكا كانوونا دویێ یا سالا 2025ێ وەلاتێ تایلەند مێڤاندارییا وێ بكەت، بۆ سالا سێیێ ل دووڤ ئێك یاریزانێن یانەیا ئافرەتێن دهۆكێ دناڤ رێزێن هەلبژارتیێ ئیراقێ دا دهێنە دیتن.
ل دۆر ڤێ یەكێ سەردار سالح سەرۆكێ یانەیا ئافرەتێن دهۆكێ بۆ رۆژنامەیا ئەڤرۆ گۆت: ل سەر داخوازییا ڕاهێنەرا هەلبژارتیێ فوتسالا ئیراقێ یا پۆرتۆگالی ڤیێرا بیتنكۆر هەردو یاریزانێن مە سیپەل شوكر و دەلال تالب دناڤ رێزێن هەلبژارتیێ ئیراقێ دانە و پێشتر پێنج یاریزان بوون، پێنەڤێت ئەڤە ژی وێ چەندێ دگەهینت مە یاریزانێن خودان شیان و زیرەك هەنە، هەرچەندە ل سەر ئاستێ تازەپێگەهشتییان ژی بەری دو مەهان نێزیكی پێنج یاریزانێن یانەیا مە بۆ هەلبژارتیێ ئیراقێ یێ فوتبۆلێ هاتبوونە داخوازكرن پشتی ڤاڤارتنێن دەستنیشانكرنا پێكهاتیێ ئیراقێ بۆ قارەمانیێن داهاتی.
هەروەسان ناڤهاتی گۆت: وەكو كارگێری سەرباری كاودانێن نەخۆش یێن دارایی مە هەموو بزاڤ كرینە كچا وەرزشڤان یا دهۆكێ ب وەرزشا خوە شادبیت بزاڤێن مە بۆ پێكئینانا تیمێن پشكۆژ و تازەپێگەهشتی و لاوان بووینە، بەرنامەیێ مە ڕێكخستی ب پلان بوویە، ل ڤێ هاڤینێ مە تیمێن جودا بڕێیا ئەكادیمیێ بەرهەڤكربوون تایبەت یێن یارییا باسكێت بۆلێ، فوتسالێ و مە دەرگەهـ بۆ پرانییا یاریێن دی ژی ڤەكربوو، لێ هەر پێنگاڤەكا دهێتە هاڤێژتن پێدڤی ب پشتەڤانییا دارایی یە، یانەیا ئافرەتێن دهۆكێ تایبەتمەندیا خوە یا هەیی ژبەركو یاریزان كچن و هاتنۆچوونا وان بزەحمەتە دڤێت پاسەكا تایبەت هەبیت دیسان پشتەڤانی بۆ بهێتە كرن، لەوما ژی مە چەندین بزاڤكرینە و داخواز ژ جهێن پەیوەندیدار كریینە و چاڤەڕێ نە تایبەت ژلایێ پارێزگەها دهۆكێ ڤە.
ژلایەكێ دووڤە ناڤهاتی گۆت: بۆ وەرزێ نوو یێ خولا كوردستانێ یا فوتسالا كچان ئەم یێ دەست بەرهەڤییان دكەین ب كادری و یاریزانێن خوە یێن باژێرێ دهۆكێ، ژبەركو تیما مە قارەمانا وەرزێ بۆری بوو، لەوما ژی دێ هەموو بزاڤان كەین بۆ وەرزێ ئەڤ سالە ناسناڤێ خوە پارێزین، هەرچەندە ئەركێ مە بزەحمەتە لێ ب پشتەڤانییا حوكمەتا هەرێمێ گەشبینن باشترین شێوە بەرهەڤییان بكەین و هەڤڕكیێ بۆ دەستڤە ئینانا ناسناڤی بكەین.
