مە داخواز كریە قوتابیێن خواندنا كوردی هەیڤانە پارەی وەربگرن
دهوك، لەزگین جوقی
رێڤەبەرێ پەروەردا شنگال دیار كر، بەغدا 30 هەزار دیناران وەكو چاڤدێریا جڤاكی بۆ قوتابیێن خواندنا عەرەبی ل شنگالێ دمەزێخیت و نادەتە قوتابیێن خواندنا كوردی ل شنگال، مە داخواز كریە قوتابیێن خواندنا كوردی هاریكاریا هەیڤانە یا چاڤدێری وەربگرن.
مەیسەر حەجی، رێڤەبەرێ پەروەردا كوردی ل قەزا شنگالێ راگەهاند، نوكە ب پشتەڤانیا حكوومەتا هەرێما كوردستانێ ل شنگالێ 70 قوتابخانەیێن خواندنا كوردی هاتینە ڤەكرن و پتر 30 قوتابخانە ل كەمپێن ئاوارێن شنگالێ ژی هەنە، ل شنگالێ خواندنا كوردی ئاریشە هەنە، چونكە مە دەستهەلات ل شنگالێ نینە و ئاریشا كێمیا قوتابخانەیان ژێ هەنە كۆ قوتابی دناڤ قوتابخانەیێن كەرڤانا دا بەردەوامی ب خواندنا خۆ ددەن، مە داخواز كریە هەڤكاری دناڤبەرا مە و بەغدایێ دا هەبیت بۆ گرنگیدان ب خواندنێ.
گۆت ژی: مە داخوازكریە قوتابیێن خواندنا كوردی ژی هەیڤانە پارەی وەربگرن یێن هاریكاری وەكۆ قوتابیێن خواندنا عەرەبی كۆ بەغدا جۆداهیێ ناكەت دناڤبەرا قوتابیاندا بۆ خواندنێ، چونكو دەمی قوتابیێن خواندنا عەرەبی پارەی وەردگرن دێ خەلكێ شنگالێ زارۆكێن خۆ رەوانەی خواندنا عەرەبی كەن، ژبەر كو خەلكێ شنگال ب خۆ خەلكەكێ هەژارە و پێدڤی هەڤكاری هەنە، هندەك خێزان چەند زارۆك هەنە، دەمێ رەوانەی قوتابخانەی دكەن بێگومان دێ پێدڤی هاریكاری بن هەتا بشین زارۆكێن وان بەردەوامی ب خواندنێ بدەن.
خۆیا ژی كر، دەزگەهی خێرخوازیێ بارزانی و بنگەهێ لالش گەلەك هەڤكاریا قوتابیێن شنگال دكەن بێ جوداهی، لەورا ئەم دخوازن بەغدا هاریكاریا قوتابیێن مە بكەت بێ جوداهی هەموو قوتابیێن خواندنا كوردی وەكو قوتابیێن خواندنا عەرەبی پارەی وەربگرن.
