بێی رازیبوونا خەلكێ وێ كۆمەلگەها شاریا نـابیتە ناوچـەداری
پارێزگارێ دهۆكێ ڕاگەهاند، دیموگرافیا كۆمەلگەها شاریا ناهێتە گوهۆڕین و كۆمەلگەها شاریا بێی رازیبوونا خەلكێ وێ نابیتە ناوچەداری.
د. عەلی تەتەر، پارێزگارێ دهۆكێ ئاشكرا كر، ل دەستپێكێ خەلكێ كۆمەلگەها شاریا داخواز كر، بڕیارا ناوچەداریبوونا شاریا ڕابگرن و ل دووڤ داخوازیا وان هاتە ڕاگرتن و گۆت: «خەلكێ كۆمەلگەهێ بوونە دو دەستە، دەستەكێ جارەكا دی داخوازا ناوچەداریبوونێ كر و ئەڤ بڕیارە دەرچوو».
پارێزگارێ دهۆكێ گۆتژی: «گوهۆڕینا دیموگرافی ل شاریا ناهێتە كرن و دێ سەرەدانا شاریا كەین و ل گەل خەلكێ خۆ كۆم بین و بێی رازیبوونا خەلكێ كۆمەلگەها شاریا، ئەو كۆمەلگەهە نابیتە ناوچەداری».
د. عەلی تەتەر، پارێزگارێ دهۆكێ خویا ژی كر، مۆلكێ ئێزدیان ل دووڤ یاسایێ یێ پاراستیە، هەر دەڤەرەكا ببیتە ناوچەداری ئارمانجا وێ ئەوە كۆ پتر خزمەتا خەلكی بهێتە كرن.
