مۆزیكا كوردی پێشڤەچوونەكا باش ب خۆڤە دیتیە
زنار تۆڤی:
خاكمەند مەجید، نوكە مامۆستایە ل كولیژا هونەرێن جوان، پشكا موزیكێ ل هەولێرێ، د دیدارەكێ دا بۆ رۆژناما ئەڤرۆ گۆت: ژبەركو من حەزەكا زۆر هەیە بۆ مۆزیكێ، لەوما من پشكا مۆزیكێ هەلبژارت، هەروەسا هەلبژارتنا ئامیرێ كلارنێتێ ژی ل سەر پێشنیارا مامۆستایێ من لوقمان جەوهەری بوو، هەر چەندە ل وی دەمی من چ شارەزایی ل سەر وی ئامیری نەبوو، بەلێ نوكە شارەزا بوویمە.
ناڤهاتی گۆت: ب دیتنا من نوكە مۆزیكا كوردی، پێشڤەچوونەكا باش ب خۆڤە دیتیە، چونكی پەیمانگەه و كۆلیژ و ناڤەندێن هونەری گرنگیەكا باش ددەنە مۆزیكا كوردی، ب تایبەی ژی ئەو ڤەكۆلینێن ل سەر مۆزیكا كوردی دهێنە ئەنجامدان، كاریگەریەكا باش هەیە ل سەر ناساندن و بەلاڤبوونا شێوازێ مۆزیكا كوردی ل دەڤەرێ و شێوازێ كاركرنا مۆزیكژەنان یێ جودایە، لەوما مەرج نینە هەر مۆزیكژەنەكی كلیپێن تایبەت هەبن، چونكی مۆزیكژەنین كارەكێ ب كۆمە، بەلێ ئەو مۆزیكژەنێن كو سۆلیستن و شێوازێ كاركرنا وان ب وی رەنگیە و پێدڤیە ئەوان كلیپێن تایبەت هەبن، كارێ وان ژی یێ گرێدایە ب ریكۆردكرنا كارێ وان یێ تایبەت ب وان ڤە، هەروەسا پشكداریكرنا مۆزیكژەنان د كۆنسێرتان دا زۆرا پێدڤییە، چونكی كارێ مۆزیكژەنینێ پێدڤی ب پشكداریكرنێ یە، ئەگەر مۆزیكژەن پشكداریێ د كۆنسێرتان دا نەكەن، ل وی دەمی مۆزیكژەن نینە، دێ بیتە مامۆستایێ مۆزیكێ یان ڤەكولەرێ مۆزیكێ.
