ماددەیێن بێهۆشكەر مەترسیەكا مەزن ل سەر جڤاكی هەیە
هەولێر، قائید میرۆ:
سەرۆكێ ئێكەتیا زانایێن ئایینێ ئیسلامێ دیار كر، ماددەیێن بێهۆشكەر بووینە مەترسی ل سەر جڤاكێ كوردستانێ و گۆت: داخوازێ ژ سەرۆك بارزانی دكەین سنورەك بۆ بەلاڤبوونا ماددەیێن بێهۆشكەر بهێتە دانان، ژبەركو ئەو وەلاتێن ماددەیێن بێهۆشكەر تێدا بەربەلاڤ تووشی كارەساتان بووینە و بلا جڤاكێ كوردستانێ ژی تووشی هەمان كارەسات نەبیت.
دكتۆر عەبدوللا سەعید، سەرۆكێ ئێكەتیا زانایێن ئایینێ ئیسلامێ، د دیدارەكێ دا بۆ رۆژناما ئەڤرۆ دیار كر، سەرۆك بارزانی د كۆڕبەندێ مێپس دا ل باژێڕێ دهۆكێ تەكەزی لسەر بابەتەكێ گرنگ كریە، ئەوژی بەرهنگاربوونا ماددەیێن بێهۆشكەرە، ژبەركو ئێك ژ وان مەترسیێن لسەر جڤاكی پەیدا بووی بەلاڤبوونا ماددەیێن بێهۆشكەرە ل هەرێما كوردستانێ.
دكتور عەبدوللا گۆت: (ئەم پشتەڤانیا سەرۆك بارزانی دكەین كو زۆر ب دژواری بەحسێ بەرهنگاربوونا ماددەیێن بێهۆشكەر كریە، ئێك ژ مەترسیێن هەرە مەزن یێن سەر هەر جڤاكەكی ماددەیێن بێهۆشكەرن، چونكە هەر وەلاتەكێ ماددەیێن بێهۆشكەر تێدا بەربەلاڤ ببن دێ رەوشت و تیتال و داب و نەریتێن خۆ ژ دەست دەت).
سەرۆكێ ئێكەتیا زانایێن ئایینێ ئیسلامێ د بەردەوامیا ئاخفتنێن خۆدا گۆت: (ئەم وەكی ئێكەتیا زانایێن ئایینی دگەل سەرۆك بارزانینە بۆ بەرهنگاربوونا ماددەیێن بێهۆشكەر، ئەڤجا چ سزادانا تاوانباران بیت یانژی رێگری بیت ل ئەڤان كەسێن بازرگانیێ ب ماددەیێن بێهۆشكەر دكەن، ئەركێ هەر تاكەكیە ژلایێ خۆڤە ژی بەرهنگاری ماددەیێن بێهۆشكەر ببیت).
دكتۆر عەبدولا سەعید گۆتژی: (ئەركێ مامۆستایێن ئایینیە خەلكی هشیار بكەن ل سەر مەترسیێن ماددەیێن بێهۆشكەر، هەموو دەمەكی مامۆستایێن ئایینی ل رێزا پێشیێ بووینە ژ بۆ هشیار كرنا خەلكی ژ زیانێن ماددەیێن بێهۆشكەر و كاریگەریێن نەرێنی بۆ سەر جڤاكی، بەلێ ڕەنگە بەرهنگاربوونا ماددەیێن بێهۆشكەر هندەك جاران تنێ ب شیرەتان نەهێتە چارەسەر كرن، بەلكۆ پێدڤی ب دەركرنا بڕیارێن سیاسی و قانوونی هەیە، هەتا رێگری بهێتە كرن ل بازرگانیا ماددەیێن بێهۆشكەر).
د. عەبدوللا دیار كر كو بازرگانێن ماددەیێن بێهۆشكەر لسەر كیستێ خەلكی خۆ دەولەمەند دكەن و مالا خەلكی وێران دكەن ب ماددەیێن بێهۆشكەر، مخابن بكارئینان و بازرگانی كرن ب ماددەیێن بێهۆشكەر ل هەرێما كوردستانێ گەهشتیە ئاستەكێ مەترسیدار و بوویە كارەسات.
سەرۆكێ ئێكەتیا زانایێن ئایینێ ئیسلامێ گۆت: (داخوازێ ژ سەرۆك بارزانی دكەین رێكارێن پێدڤی بگریتە بەر ژ بۆ كێمكرن و نەهێلانا ماددەیێن بێهۆشكەر، ژبەركو هەر جڤاكەكێ ماددەیێن بێهۆشكەر تێدا بەلاڤبۆن ئەو جڤاك دێ هەڕفیت، ژبەركو ئەم دبینین ئەو وەلاتێن ماددەیێن بێهۆشكەر تێدا بەلاڤبوی تووشی چ كارەسات و مال وێرانیێ بووینە).
