یانه‌یا سێمێلێ گه‌فێن خوه ڤه‌كێشانێ ژ خولا كوردستانێ دكه‌ت
د داخویانیه‌كێ دا جێگرێ سه‌رۆكێ یانه‌یا سێمێل یا وه‌رزشی دوور نابینیت هه‌كه پشته‌ڤانییا دارایی بۆ تیما وان نه هێته كرن ئه‌و بڕیارا خوه ڤه‌كێشانێ ژ خولا پلا ئێكا كوردستانێ بۆ وه‌رزێ ئه‌ڤ ساله و نه‌چارین هه‌موو ئه‌گه‌رێن ڤێ بریارێ سوبه‌هی دیار بكه‌ین.
زێده‌تر په‌روه‌ر حسێن بۆ رۆژنامه‌یا ئه‌ڤرۆ گۆت: ل دووڤ ڕاسپارد و دلنیایا به‌رپرسێن مه كو دێ پشته‌ڤانییا تیما مه یا فوتبۆلێ هێته كرن پێخه‌مه‌ت پشكداری د وه‌رزێ نوو یا خولا پلا ئێكا كوردستانێ دا، له‌وما ژی هه‌رزوو مه كۆمبوونێن جودا كرن وبه‌ری سێ حه‌فتییان كادرێ خوه یێ ڕاهێنانێ ده‌ستنیشانكرن كوڕێن باژێرێ دهۆك و سێمێلێ نه و هه‌روه‌سان ده‌ست ب دانۆستاندنێ دگه‌ل كۆمه‌كا باش یا یاریزانان كر و شیان تیمه‌كا ڕێكخستی و باش دروستكریه و ده‌ست ب راهێنان و یاریێن هه‌ڤالینی كر، پێنه‌ڤێت مه‌ره‌ما مه یا سه‌ره‌كی ژی ئه‌وه پشته‌ڤان و وه‌رزشڤانێن خه‌لكێ سێمێلێ دلخوه‌ش بكه‌ین و ناڤێ سێمێلێ د هه‌لكه‌فتا كوردستانی بهێته دیاركرن و تیما خوه ژ پلا ئێك بۆ پلا نایاب سه‌ربێخین، یا ژ هه‌مووییان گرنگتر ده‌لیڤه بۆ وه‌رزشڤانێن پارێزگه‌هێ ب گشتی و یێن سێمێلێ ب تایبه‌ت په‌یدابیت د وه‌رزشێ دا به‌رده‌وامبن.
هه‌روه‌سان ناڤهاتی گۆت: پێنگاڤا مه ل سه‌ر ڕاسپاردی و هه‌بوونا سۆزێن د ده‌مێ بانگه‌شه‌یا هه‌لبژارتنان دا هاتینه كرن كو كۆژمه‌یه‌كێ پاره‌یی وه‌كو پشته‌ڤانی بۆ یانه‌یێ بهێته ته‌رخانكرن ژلایێ سه‌رۆكێ حوكمه‌تا هه‌رێما كوردستانێ ئه‌وا ب نڤێساره‌كا فه‌رمی گه‌هشتی و رازیبوون ژی ل سه‌ر هاتییه كرن لێ ئه‌و گۆژمه هه‌تا نوكه ژی نه گه‌هشتییه به‌رده‌ستێ كارگێرییا یانه‌یێ كو بشێن كارۆبارێن خوه بڕێڤه‌ببه‌ین و مووچه‌یێ یاریزانان بۆ به‌رهه‌ڤبكه‌ین، هه‌روه‌سان سۆز ب مه هاتبوو دان پاسه‌كا هاتنوچوونێ بۆ یاریزانان په‌یدا بكه‌ن لێ ئه‌و ژی هه‌تا نوكه چو نه هاتیه كرن، له‌وما ژی هه‌كه نه گه‌هییته ده‌ستێ مه ئه‌م دێ نه چاربین سوبه‌هی د پرێسكۆنفرانسه‌كێ تایبه‌ت دا و بڕیارا خوه‌ڤه‌كێشانێ ژ خولا پلا ئێكا كوردستانێ و ڕاوه‌ستیانا هه‌موو چالاكییان ڕاگه‌هینن و دێ ئه‌گه‌رێن خوه‌ڤه‌كێشانێ بۆ هه‌موو پشته‌ڤان و وه‌رزشڤانێن قه‌زایا سێمێلێ دیاركه‌ین.
بۆ زانین ئه‌ڤه بۆ ماوه‌یێ زێده‌تر سێ حه‌فتییه تیما یانه‌یا سێمێل ب سه‌رپه‌رشتیا راهێنه‌ر ئاشتی مسته‌فا ده‌ست ب راهێنانان كرینه و نه شیاینه مووچه‌یێ هیچ یاریزانه‌ك و كادرێ راهێنانێ بۆ دابینبكه‌ن و بڕیاره ئێكه‌م یارییا خوه ل 15ێ كانوونا بهێت ئێكه‌م یارییا خوه ژ خولا پلا ئێكا كوردستانێ بكه‌ت.
