رامان ژ (گولا شین) بزاڤكرنە بۆ ب دەستڤەئینانا هەر تشتەكی
بێوار حەمدی:
مەدیاكار و دەرونناس (ئەڤیندار زۆربێر) د دیدارەكێ دا بۆ رۆژناما ئەڤرۆ گۆت: ل دەستپێكێ ژبەر دابونەریتێن خێزانێ ئەز نەشیام كارێ مەدیایێ بكەم، پاشان ل دووف داخوازا بەرپرسێ پشكا بەرنامەیان ل كەنالێ (وار تیڤی) نوكە بەرنامەیێ (گولا شین) پێشكێش دكەم.
هەروەسا گۆت: ژبەركو تایبەتمەندیا من دەرونناسیە من گولا شین هەلبژارت كو بەرنامەیەكێ دەرونی بیت، رامان ژ گولا شین ئەوە كو بزاڤكرنە بۆ ب دەستڤەئینانا هەر تشتی، كو چ تشت نینە دژیانێ دا دشیانێن مرۆڤی دا نەبیت، بەلكو دشیێن هەر تشتێ مە بڤێت ب دەستڤە بینین، ژبەركو گولا شین د سروشتی دا نینە و زانایان دروستكریە، لەورا ناڤێ وێ كرنە بزاڤكرن بۆ ب دەستڤەئینانا هەر تشتەكی و ژبەركو من دبۆارێ جڤاكێ مەدەنی دا كاردكر، من دیت كو خەلكێ مە گەلەك پێدڤی ب بەرنامەیێن دەروونی هەیە، لەورا من ژی بێی دو دلی گولا شین هەلبژارت و ب حەزكرنا خودێ د هەیڤێن بهێن دا ل دووف داخوازی و بۆچوونێن خەلكی دێ گوهۆڕینێن باشتر د بەرنامەی دا كەین.
