گوندیێن بۆسەلێ دخوازن ڕێكا گوندی بهێتە قیركرن
زاخۆ، دلۆڤان هالۆ:
گوندێ بۆسەلێ سەر ب ناحیا دەركارێ ڤە ل زاخۆ، ژ لایێ ڕژێما بەعس ڤە هاتبوو وێران كرن، بۆ دەمێ سیهـ سالان گۆندیان نە دشیان ب تڕۆمبێلێ سەرەدانا گۆندێ خوە بكەن، لێ د نوكە دا ب بڕیارا حكومەتا هەرێما كوردستانێ ڕێكا گۆندی ب تێكەلەیی هاتیە ڤەكرن، لێ خەلكێ گۆندی دخوازن ڕێكا گۆندی بهێتە قیركرن.
ڕیاز جاسم بۆسەلی، مۆختارێ گۆندێ بۆسەلێ بۆ ڕۆژناما ئەڤرۆ دیار كر كو هەر ژ كەڤن دا هەتا نوكە ڕێك ل گۆندێ مە نەبوو، بتنێ ڕێكەكا پیادە هەبوو و تڕۆمبێل نە دگەهشتنە گۆندی، ئەم سۆپاسیا حكۆمەتا هەرێما كوردستانێ دكەین كو بۆ مە ڕێكا گۆندی ب تێكەلەیی ڤەكریە، و پشتی ڕێكا گۆندی هاتیە ڤەكرن مرگەفتەك ژی بۆ خەلكێ گۆندی و گەشتیاران هاتیە دروست كرن، لێ داخوازا مە یا سەرەكی ئەوە كو ڕێكا گۆندی بهێتە قیركرن چونكی ئەگەر بارانێن دژوار بهێن دێ ڕێك هەمی خراب بیت.
جەهوەر محەمەد، ڕێڤەبەرێ ناحیا دەركارێ ل زاخۆ گۆت:”ڤەكرنا ڕێكا گۆندێ بۆسەلێ ب درێژاهیا پێنج هزار كیلۆمەتران ب تێكەلەیی دێ بیتە كار ئاسانی بۆ هەمی خەلكێ گۆندی ب شێوەیەكێ گشتی و ب تایبەت بۆ جۆتیار و گەشتیاران و د هەمی بواران دا دێ مفا ژێ هێتە وەرگرتن”.
ناڤهاتی گۆت ژی:”هژمارەكا زۆر یا ڕەز و بیستانان ل گۆندێ بۆسەلێ هەنە، لەوما ڤەكرنا ڤێ ڕێكێ دێ كەرتێ چاندنێ پێش ڤە بەت و ل داهاتی ژی بۆ خوەشكرنا ڤێ ڕێكێ دێ هەمی بزاڤ و پێكۆلان كەین كو ڕێكا گۆندی بهێتە قیركرن”.
