زاخۆ و هەولێر دکلاسیوکۆیا كوردستانێ دا و ئاكرێ مێڤانا پێشەسازییە
قەیس وەیس:
چاڤەڕێ دهێتە كرن سوبەهی ئەینی هەڤڕكیێن گەڕا پێنجێ ژ قۆناغا ئێكێ یا خولا پلا نایابا كوردستانێ یا فوتبۆلێ ب ئەنجامدانا سێ یارییان بهێتە كرن و شەمبییا بهێت چار یاریێن دی ژی هەبن ئەوا د ڤێ حەفتیێ دا یانەیا هندرین دێ چاڤەڕێ بیت.
یاریێن سوبەهی، ل هەولێرا پایتەخت قارەمانا وەرزێ بوری تیما یانەیا ئاكرێ دێ بیتە مێڤانا یانەیا پیشەسازی د یارییەكا پری هەڤركی دا بۆ هەردو یانەیان، ژبەركو یانەیا ئاكرێ كوڕێن پایتەختێ ئاگرێ نەورۆزێ سەرجەمێ چار یارییان بتنێ دو یاری ئەنجامداینە و سەركەفتن ئیناینە ب كۆمكرنا شەش خالان رێزا حەفتێ دهێت، یارییە هاتییە پاشئێخستن و یارییەك ژی چاڤەڕێ بوو ل دووڤ سیستەمێ خولێ، د بەرانبەر دا یانەیا پیشەسازی خودانا حەفت خالایە رێزا سێیێ دهێت و سێ یاری ئەنجامداینە، ئانكو هەردو تیم تووشی خوسارەتیێ نەبووینە و هەردو شەڕێ پێشڤەچوونێ بۆ رێزێن ئێكێ دكەن.
ژلایێ خوەڤە یانەیا زاخۆ ئەوژی دێ بەر ب هەولێرا پایتەخت چیت و بیتە مێڤانا خودانێن مالێ یانەیا هەولێرێ د یارییەكا دهێتە هژمارتن دێربیێ كوردستانێ، ژ بەر گرنگی و تایبەتمەندیا وێ دناڤبەرا هەدو یانە و پشتەڤانێن وان دا، كوڕێن خابۆری ژی هەتا نوكە ل سەر ڕێكەكا باش بڕێڤە دچن ئەوێن شیاین حەفت خالان كۆمبكەت و رێزا چارێ دهێن، لێ یانەیا هەولێر ئەوا سێ یاری ئەجامداین ژ رێزا 10ێ پاشڤەچوو رێزا 14ێ پشتی سكالا یانەیا برایەتی دژی هەولێرێ ب سەركەڤیت ئەوا یارییا وان بێ گۆل وەكهەڤ بووین لێ هەولیر ب خوسارەتی هاتە هژمارتن ل جهێ دو خالان بوو خالەك بتنێ د چانكا وێ دا، ژبەركو یاریزانەكێ یانەیا برایەتی بێ وەرگرتنا مافێ دەستبەردابوونێ یاری بۆ یانەیا هەولێر كربوو، ئەڤ یارییە ب سانەهی نابیت بۆ هەردو یانەیان هەولێر دێ شەڕێ ڤەگەڕیانێ كەت و زاخۆ دێ بۆ بەردەوامییا ئەنجامێن باش كەت.
ژ یاریێن دی یێن سوبەهی، چوارقۆرنە- ڕزگاری، سیروانی نوو- ڕانیە، رۆژا شەمبی، پێشمەرگەیا هەولێر- برایەتی، سەیدسادق- شێروانە، شەقلاوە- دەربەندیخان ، بۆ زانین هەموو یاری دێ ل دەمژمێر دو یێ پشتی نیڤرۆ هێنە ئەنجامدان.
