شاندەكێ پارێزەرێن دهۆكێ ل وەلاتێ ئیتالیا پشكداری خولەكێ دبـن
زنار تۆڤی:
د. نەزمی بەرواری، ئەندامێ شاندێ پارێزەرێن كوردستانێ ل ئیتالیا، بۆ رۆژناما ئەڤرۆ دیار كر، شاندەكێ پارێزەرێن كوردستانێ، ل سەر بابەتێ مافێن مرۆڤی د یاسایێن نێڤدەولەتی دا چووینە وەلاتێ ئیتالیا و دبێژیت: د وێ خۆلێ دا مە دیاركر، ئەم دخوازین مافێن كوردان ژی وەكو هەموو گەلێن جیهانێ د یاسایێن نێڤدەولەتی دا بهێنە چەسپاندن.
ناڤهاتی گۆت: «مە د وێ خولێ دا بۆ پشكداربوویان ئاشكرا كر، ئەم ژ هەوە هەموویان پێگیرترین بۆ ژینگەهێ، بەلێ هوون ب تۆپ و فرۆكان هێرشان د ئیننە سەر وەلاتێ مە، دیسان مە بۆ وان دیار كر، ژینگەه و مافێن مرۆڤی و دەستوور، یێن بووینە حبر ل سەر كاغەزێ«.
گۆتژی: «ل سەر داخوازیا رێكخراوا ئودمیت یا ئیتالی، مە پشكداری د خولەكێ دا ل ژێرناڤێ مافێن مرۆڤی، مافێن ژینگەهان د یاسایێن نێڤدەولەتیدا كر، ئەم وەكو شاندەكێ پارێزەرێن كوردستانێ و دهۆكێ چووینە وەلاتێ ئیتالیا، ئەڤ خولە ژ لایێ وەلاتێ ئیتالیا ل رۆما پایتەخت هاتبوو رێكخستن، تێدا ب درێژی بەحسێ پاراستنا مافێن مرۆڤی و پاراستنا ژینگەها وەلاتان د یاسا و دەستۆرێن وەلاتان دا هاتە كرن».
