بازاڕەكێ حەفتیانە یێ بەرهەمێن خۆمالی ل دەڤەرا ئامێدیێ دێ هێتە ڤەكرن
ئامێدیێ، مەحمود نهێلی:
ل ژێر چاڤدێریا بەرەڤان حەمدی، ئەندامێ كۆمیتا ناڤەندی و بەرپرسێ لقێ 18 یێ پارتی ل ئامێدیێ و ب بەرهەڤبوونا وارشسین سەلمان، دەڤەردارێ ئامێدیێ، ل بارەگایێ لقێ و د رێورەسمەكی دا، هەژمارەكا سەرپەرشتێن لژنێن هەردو فەستیڤالێن بەرهەمێن خۆمالی یا (تەحینا ئامێدیێ و سێڤا بەرواریا) و رێڤەبەرێن دام و دەزگەهێن میری هاتنە خەلاتكرن.
بەرەڤان حەمدی، بەرپرسێ لقێ 18 ل ئامێدیێ بۆ رۆژناما ئەڤرۆ دیار كر، ب ئارمانجا هەلسەنگاندنا وان كارێن خزمەتگوزاری یێن هاتینە پێشكێشكرن، تایبەت فەستیڤالا تەحینا ئامێدیێ و بەرهەمێن خۆمالی ل دەڤەرێ و فەستیڤالا بەرهەمێن خۆمالی ل ناڤ بەرواریان و ژ بۆ سوپاسیا وان دام و دەزگەهێن پێرابووین ب سەركەفتیانە و یێن كارئاسانی بۆ برێڤەچوونا وان فەستیڤالان كرین، ئەڤ ڕێورەسم و روونشتنە هاتیە ئەنجامدان.
ناڤهاتی ئاشكرا كر، د ڤی رێورەسمی دا هەژمارەكا ڤان سەرپەرشت و رێڤەبەرێن فەرمانگەهێن میری ل دەڤەرێ هاتنە خەلاتكرن و گۆت: «د ڤێ روونشتنێ دا خواندنەك ژ بۆ پێشنیارا بازارەكێ حەفتیانە ل دەڤەرێ هاتەكرن و ئەنجامدانا هندەك كۆنفرانسان ژ بۆ پویتەدانەكا مەزنتر ب بەرهەمێن خۆمالی، زۆرترین رێژەیا گەشتیاران و تایبەت ل رۆژێن پێنج شەمبی و ئەینی و شەمبی قەستا دەڤەرێ بكەن، داكو گەشەیەكا ئابۆری ل دەڤەرێ پەیدا ببیت.
