قووناغا دوومـاهیێ ژ پرۆسێسا سەرژمێریا گشتی دەستپێكر
دهوك، لەزگین حوقی:
رێڤەبەرێ ئامارا پارێزگەها دهۆكێ دیار كر، قووناغا دووماهییێ ژ پرۆسێسا سەرژمێرییا گشتی ل دهۆكێ دەستپێكر و دبێژیت: پتری 70 پرسیار دێ ژ وەلاتییان هێنە كرن، لەو داخوازێ ژ وەلاتییێن خۆجهێن دەرڤەی ئیدارا هەرێما كوردستانێ دكەین ژ هەر خێزانەكێ كەسەك ڤەگەڕیتە جهێن خۆ یێن ئاكنجیبوونێ ژبۆ بەرسڤدانا پرسیارێن بژمێران.
چیاڤان عەبدولرەزاق، رێڤەبەرێ ئامارا پارێزگەها دهۆكێ بۆ رۆژناما ئەڤرۆ ئاشكرا كر، هەر كەسەكێ نەهاتیە تۆماركرن، دشێت پەیوەندیێ ب هێلێن گەرم بكەت یان رێڤەبەریا ئامارا دهۆكێ بكەت و گۆت: «پشتی ئەم پشتراست دبین، كو ئەو كەسە نەهاتیە تۆماركرن، دێ بژمێر چن تۆماركەن، ئەم داخوازین هەمی كەس خۆ تۆمار بكەن و چ كەس نەمینن، پتری چار هزار و 200 بژمێر ل گەل پتری هزار سەرپەرشتێن سەرژمێرییا گشتی جارەكا دی دەست ب قووناغا دووماهییێ یا سەرژمێریێ كرن».
ناڤهاتی خویا ژی كر، بەری نوكە زانیاریێن دەستپێكی ژ خێزانان هاتینە وەرگرتن، نوكە هەمی زانیاریێن خێزانان دێ هێنە وەرگرتن، كو جهێن ژ دایكبوونێ و ئایین و ماوەیێ ئاكنجیبوونێ و ساخلەمیا كەسی و بارێ ئابووری و ئاستێ خواندنێ، ئەڤ پرسیارە و گەلەك پسیارێن دی، د ڤێ قووناغێ دا ژ وەلاتیان دێ هێنە كرن.
