15 تووشبوویێن ئایدزێ ل دهۆكێ هەنە
دهوك، لەزگین جوقی:
رۆژا جیهانی یا ئایدزێ ل دهۆكێ ب چەندین چالاكیان هاتە ساخكرن و 15 تووشبوویێن ئایدزێ ل دهۆكێ هەنە و رێڤەبەرێ گشتیێ ساخلەمیا پارێزگەها دهۆكێ ژی دبێژیت: بێی حەزا خودانی پشكنین ناهێنە كرن و پێزانینێن تاكە كەسی و ناڤونیشان ناهێنە وەرگرتن، پشكنین ژی ب شێوەیەكێ نهێنی دهێنە كرن و ب چو شێوەیان ناڤونیشانێن نەخوشی ناهێنە دیاركرن، دیسا داخوازێ ژ هەمی وەلاتیان دكەین رێنمایان بكاربینن، داكو ئەڤ نەخوشیە نەهێتە ڤەگوهاستن.
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆكێ خویا كر، ئەڤ ڤایرۆسە ب رێكا خوینێ و ئەندامێن سكسی پتر دهێتە ڤەگوهاستن و گۆت: «چارەسەریا ئیك جاری بۆ نەخوشیا ئایدزێ نینە، لێ ب وەرگرتنا دەرمانێن دژی ڤایرۆسی، دشیان دایە كونترۆلا ڤایرۆسی بكەین ونەهێلین بهێتە ڤەگوهاستن و نەخوش دشێت ژیانەكا ساخلەم و بەرهەمدار ببەتە سەر».
د. ئەحمەد عەلی، بەرپرسێ پروگرامێ ئایدزێ ل ساخلەمیا دهۆكێ گۆتژی: «ئەم بۆ هەمی كەسان پشكنینان دكەین، بێ ناڤونیشانێ وان كەسان ئاشكرا بكەین، ل پارێزگەها دهۆكێ 15 كەس تووشی نەخۆشیا ئایدزێ بووینە، ژ وان 11 كەس رەگەزێ نێرن و چار ژی رەگەزێ مێ نە و گۆت: «ئەڤ سالە سێ كەس ل دهۆكێ تووشی ئایدزێ بووینە».
د. سەگڤان حەسەن، بەرپرسێ نەخۆشیێن ڤەگر ل ساخلەمیا دهۆكێ راگەهاند، ئایدز ب رێكا چوونا دەستی و پشكداریا د خوارنێ دا و بكارئینانا كەلوپەلێن خوارنێ یێن نەخوشی و بكارئینانا جهێن دەستئاڤێ و هەمبێزكرن و چوونا سەروستوویێن ئێكودو و كوخك و بێهنژینێ ناهێتە ڤەگوهاستن و گۆت: «ئایدز ب رێكا كریارێن سكسی یێن نەپاراستی و ب رێكا خوینێ ژ كەسێن تووشبوویێ ئایدزێ دهێتە ڤەگوهاستن، دیسا نابیت كەلوپەلێن تایبەت یێن كەسێن تووشبوویی بهێنە بكارئینان».
