ئەگەر محسن: جاران هەبوویە بەری یاریێ گەف ل دادڤانان هاتینە كرن
شاهۆ فەرید:
د دیدارەكا كورت دا دادڤانێ پارێزگەها دهۆكێ یێ یارییا فوتبۆلێ ئەگەر محسن بۆ رۆژنامەیا ئەڤرۆ دیار كر ئەڤە زێدەتری هەشت سالە وەكو دادڤانێ ئێكێ و هاریكاری د هەردو خولێن كوردستانێ و ئیراقێ یاری بڕێڤەبرینە و جاران هەبوویە بەری یاریێ گەڤ ل سەر هاتینە كرن.
زێدەتر ناڤهاتی گۆت: پێخوەشحالم وەكو ئێك ژ دادڤانێن پارێزگەها دهۆكێ دگەل هەڤالێن خوە پشكداریێ د یاریێن خولێن ئیراقێ و كوردستانێ دكەین و گەشبینم دێ رێژەیا دادڤانان بەر ب زێدەبوونێ چیت ئەو ژی هەكە پشتەڤانی بوو بهێتە كرن، ژبەركو ئاستێ دادڤانێن پارێزگەهێ چ كێمترنینە ژ پارێزگەهێن دی و مە ژی شیانێن باش هەنە، لڤێرە من دڤێت سۆپاسیا هەر كەسەكێ دكەم یێن ب كریار و شیرەت لمن كرین تایبەت جێگریێ سەرۆكێ لژنەیا دادڤانێن كوردستانێ نوزاد سالح كو پشتەڤانیەكا باش لمن دكەت و یا دشیان دا بیت دێ باشترین شێوە پێشكێشكەم.
ژلایەكێ دووڤە ئەگەر محسن ئەوچەندە ژی گۆت: جاران هەیە بەری یاریێ ژلایێ كارگێریا یانەیەكێ یان جەماوەری گەف ل دادڤانی هاتینە كرن بەری یاریی دا كارتێكرنێ ل دەرونێ وی بكەن و بڕیارێن بەرژەوەندیا واندا ل یاریگەهێ بدەن، من سوزدایە هەر یاریەكا برێڤەبەم و یاریگەهێ دەركەڤم كێمترین شاشی من كربن بڕیارێن خوە دا، تۆندوتێژیی بەرامبەری دادڤانا ئەڤ كارێ نەشرین بەر ب نەمانێ دچیت و پۆلیسێن یاریگەهێ ژی گەلەك مە دپارێزن.
دادڤانێ پارێزگەهێ گۆت: جوداهیەكا كێم دناڤبەرا خولێن ئیراقێ و كوردستانێ دا هەیە ژلایێ یاریگەهان، چەند ئاستێ خولێ بلندتر بیت ئاستێ رەوشەنبیریا یاریزانان و یانەیان ژی دهێتە گوهۆڕین، هەردو خولا هەمان ئاست هەنە، ئەڤ گوهۆڕینێن پەیدادبن هاتنا ڤاریێ یە كو شاشی كێمكرینە و بڕیارێن دورست ژلایێ دادڤانا دهێنەدان، لێ ڤار ل خولا كوردستانێ نینە، هیڤییا من ئەوە خولا كوردستانێ بەر بهێزبوونێ و باشتر بچیت.
