ئاكرێ دێ بزاڤێن پێشڤەچوونێ د رێزبەندیێ دا كەت
چاڤەڕێ دهێتە كرن ئەڤرۆ ل دەمژمێر دو یێ پشتی نیڤرۆ هەڤڕكیێن گەڕا شەشێ ژ قۆناغا ئێكێ یا خولا پلا نایابا كوردستانێ یا فوتبۆلێ ب ئەنجامدانا سێ یارییان، سوبەهی چار یاریێن مایی ژی د بەردەوامبن، د ڤێ گەڕێ دا یانەیا ڕزگاری دێ یا چاڤەڕێ كری بیت.
ل هەولێرا پایتەخت كوڕێن پایتەختێ نەورۆزێ یانەیا ئاكرێ دێ بنە مێڤانێن یانەیا برایەتی د یارییەكا ب سانەهی نابیت بۆ لەشكەرێ ئاكرەییان ئەوێن ژ سەرجەمێ پێنج یارییان بتنێ سێ یاری كرینە، ب دو سەركەفتن و ئێك خوسارەتی هەیە شەش خال كۆمكرینە ل رێزا هەشتێ دهێت، یارییەك چاڤەڕێ كری بوو ل دووڤ سیستەمێ خولێ و یارییەك دگەل هەولێرێ هاتبوو پاشئێخستن، د بەرانبەر دا یانەیا برایەتی خودانا 10 خالانە ژ پێنج یارییان رێزا دویێ دهێت ئەو ژی دێ بزاڤێ كەت پاشڤە نە ڤڕیتە پلێن كێمتر، دڤ ێ یاریێ دا یانەیا ئاكرێ خودانا ناسناڤێ وەرزێ بوری دێ پشت گەرمیێ ب كۆمەكا یاریزانێن خوە كەت ژ وانا، ئەركان مەنسۆر، سانی سەلام، دلۆڤان سالح، رابەر جەلال، عەلی فائیق و گۆلپارێزێ خوە عەباس یابەری كەت.
ژ یاریێن دی یێن ئەڤرۆ، یانەیا پیشەسازی ئەوا بۆ جارا ئێكێ یە د هێتە پلا نایاب خودانا رێزا سێیێ دێ مێڤاندارییا یانەیا هندرین كەت، ڕانیا دێ بیتە مێڤانا یانەیا چوارقۆرنە.
لیستەیا خولێ بڤی شێوەیە.
1- شێروانە 13 خال.
2- برایەتی 10 خال.
3- پیشەسازی 10 خال ژ چار یارییان.
4- زاخۆ 10 خال.
5- ڕزگاری هەشت خال.
6- دەربەندیخان حەفت خال.
7- پێشمەرگەیا هەولێر حەفت خال.
8- ئاكرێ شەش خال ژ سێ یارییان.
9- ڕانیە شەش خال.
10- سیروانی نوو پێنج خال ژ چار یارییان.
11- شەقلاوە سێ خال.
12- چوارقۆرنە دو خال.
13- هندرین دو خال ژ چار یارییان.
14- سەید سادق دو خال ژ چار یارییان.
15- هەولێر ئێك خال ژ چار یارییان.
ل دووڤ ئارمارێن گەڕا پێنجێ سەرجەمێ حەفت یارییان، 18 گۆل هاتبوونە تۆماركرن، بلەزترین گۆل د خولەكا پێنجێ دا بوو یا یاریزانێ برایەتی عەبدولرەحمان محەمەد، 25 كارتێن زەرد و چار یێن سۆر هاتینە بلندكرن.
