ڤیێرا پیتنكۆر: هه‌لبژارتیێ ئیراقێ پشت گه‌رمیێ ب یاریزانێن كوردستانی دكه‌ت
قەیس وەیس:
د دیداره‌كێ دا ڤیێرا پیتنكۆر ڕاهێنه‌را هه‌لبژارتیێ ئیراقێ یا فوتسالێ بۆ كچان یا پۆترتۆگالی خویا كر د كه‌مپێ ڕاهێنانێ یێ هه‌لبژارتیێ ئیراقێ پێنگاڤێن باش هاتینه هاڤێژتن ژبۆ دروستكرنا هه‌لبژارتیێ ئیراقێ خوه به‌رهه‌ڤكرن بۆ ڤاڤارتنێن كۆپا ئاسیا و دووڤدا یێن مۆندیالا جیهانێ.
هه‌روه‌سان ناڤهاتی گۆت: كه‌مپێ مه یێ مه‌غرب ب چه‌ند قۆناغه‌كێن به‌رهه‌ڤییان ده‌رباز دبیت، ژ لایێ چه‌سته‌یی، پێشئێخستنا ئاست و شیانێن یاریزانێن كچ دگه‌ل هه‌لبژارتیێ ئیراقێ، د ماوه‌یێ كه‌مپی دا دو یاری هاتینه كرن، بۆ مه گرنگ ئه‌نجام نه‌بووینه به‌لكۆ باشترین شێوه یاریزانێن مه مفایی ژێ وه‌ربگرن و ئه‌م ژی بشێن ل دووڤ به‌رنامه‌یێ خوه ب گه‌هینه ئارمانجا مه پێ دڤێت، د هه‌ردو یارییان دا گوهۆڕینه‌كا به‌رچاڤ هاته پێش هه‌روه‌سان ئه‌و شاشیێن د یارییا ئێكێ دا په‌یدابووی شیان د یارییا دویێ دا چاره‌سه‌ربكه‌ین و هه‌ر یاریزانه‌ك جهێ خوه یێ دروست وه‌ربگریت.
ژلایه‌كێ دووڤه ناڤهاتی گۆت: یاریزانێن هه‌لبژارتیێ ئیراقێ پرانییا وان یێن هه‌رێما كوردستانێ نه و باشترین یاریزانن ل سه‌ر ئاستێ ئیراقێ كو پشت گه‌رمیێ ب یاریزانا كوردستانی دكه‌ت، زووتر شیانێن وان دهێنه دیتن و خوه پێش دئێخن، سه‌ره‌ده‌رییا وان دگه‌ل یارییان گه‌له‌ك یا دروسته من باوه‌ری ب شیانیێن وان یێن هه‌ین، گه‌شبینم بۆ ڤاڤارتنێن ئاسیا ئه‌وا دێ ل تایله‌ند هێته كرن بنه هژماره‌كا ب زه‌حمه‌ت و پلێتا ده‌ربازبوونێ ب ده‌ستڤه ئینن.
ل دووڤ لیسته‌یا پێكهاتیێ هه‌لبژارتیێ فوتسالا ئیراقێ چار یاریزانێن یانه‌یا ئافره‌تێن دهۆكێ دگه‌ل دانه، دو یاریزانێن یانه‌یا ئافره‌تێن هه‌ولێرێ نه، چار یاریزانێن یانه‌یێن سلێمانی و كه‌ركووكێ نه.
