هاڤێتنا گلێش و بەرمایكان ل سەر جادێن سەرەكی یا بوویە دیاردە
سندس سالح سلێڤانەیی:
هاڤێتنا گلێش و بەرمایكان ل دەروبەرێن دهۆكێ یا بوویە دیاردەیەكا رۆژانە و جوانی و ژینگەها باژێری گەلەك تێكدایە، خەلكەكێ گوندێن دەروبەر ژ ڤێ چەندێ د بێزارن و باژێرڤانی ژی دبێژیت: مە حاویێن تایبەت بۆ گلێشی یێن داناین، لێ خەلكەك نە یێ هاریكارە، ژ وانا خودانێن هندەك مەزرەعەیان.
وەلاتیەك ژ گوندێ باجلۆرێ دبێژیت: رۆژانە دەوروبەرێن جادەیا گوندێ مە پری گلێش و بەرمایكیێن خوارنێ دبیت و ئەڤە چەندە ژلایێ خەلكەكێ نە رەوشەنبیرڤە دهێتە ئەنجام دان و ڤێ دیاردێ ئەم دلگران كرینە، چونكو زێدەباری تێكدانا ژینگەهێ جوانیا دەڤەرێ ژی تێكدایە و دخوازین كەسێن وێ زێدەگاڤیێ دكەن لپێرسین دگەل بهێتە كرن.
وەلاتیەكێ دی ژ گوندێن پشتا سكرێ دهۆكێ دبێژیت: جهێ داخێ یە ئەڤ سروشتێ هندە جوان ژلایێ هندەك تێكدەران ڤە بهێتە پیسكرن و چو سزادان بۆ وان كەسان نەبن و هیڤیا من ئەو ئەڤ دیاردەیە نەمینیت و ئێدی ئەم هەموو پێكڤە ژینگەها باژێر و وەلاتێ خوە راگرین.
ئەندازیار دیار سەعید، بەرپرسێ پشكا ژینگەهێ ل رێڤەبەریا گشتی یا باژێرڤانیان د بەرسڤا واندا دبێژیت: هەتا نوكە ئەم وەك گوند سەرەدەریێ ل گەل وان دكەین و حەفتیێ دو جاران هەتا سێ جاران دشیێن بچین گلێشێ وان راكەین، چونكو مە هند ترۆمبێلێن پاقژكرنێ نینن، لێ دگەل هندێ خەلكەك ژی نە یێ هاریكارە، بۆ نموونە ل هندەك جهان مە حاویێن گلێشی یێن داناین، دەمێ ترۆمبێلێن مە دچن دێ بینن ئەو حاویە یا ڤالایە و دەروبەرێن وێ پری گلێشن، ئانكو هندەك خەلك گلێشی دهاڤێژنە سەر جادێ و ناكەنە د حاویێ دا، ب تایبەت ژی خودانێن هندەك مەزرەعەیان.
