سوبەهی گەڕا یازدێ یا فلمە فەستیڤالا دهۆكێ یا نێڤدەولەتی دێ دەستپێكەت
زنار تۆڤی:
سوبەهی دوشەمبی 9/12/2024 ێ، گەرا یازدێ یا فلمە فەستیڤالا دهۆك یا نێڤدەولەتی دێ دەستپێكەت و هەتا رۆژا 16/12 دێ یا بەردەوام بیت
مەسعود عارف، پەیڤدارێ وێ فەستیڤالێ بۆ رۆژناما ئەڤرۆ دیاركر كو بۆ گەڕا یازدێ وەلاتێ مێهڤان، وەلاتێ هندستانێ یە، د هەمان دەمدا ئەڤ سالە گرۆپەكێ سەماكەرێن هندستانێ كو ژ شەش كەسان پێك دهێت دێ مێهڤانێن فەستیڤالێ بن و دێ ئاهەنگەكا تایبەت ژی گێرن، هەروەسا فلمێ ڤەكرنا فەستیڤالێ دێ فلمێ هیڤی بیت، كو ژ دەرهێنانا ئۆرهان ئینجەیە ژ باكورێ كوردستانێ، سوبەهی دێ ل هۆلا كۆنفرانسان دێ هێتە نیشاندان.
ناڤهاتی گۆت: ئەڤ سالە 107 فلم ل هەموو پشكێن فەستیڤالێ هاتینە وەرگرتن، ژ وانا 55 فلم دێ هەڤڕكییێ ل سە ر ب دەستڤەئینانا خەلاتێن فەستیڤالێ كەن، دیسان 61 فلمێن بیانی ژ 31 وەلاتێن جیهانی هاتینە وەرگرتن، ل گەل 46 فلمێن كوردی، د هەمان دەمدا مژارا ئەڤ سالە ل سەر وەرزشێ یە، دیسان وەرزش و هونەر نێزیكی ئێكن لەوما مە ئەڤ سالە وەرزش هەلبژارتیە، ئەڤ سالە پتری 200 سینەماكار و هونەرمەند دێ پشكداریێ د گەڕا یازدێ یا فلمە فەستیڤالا دهۆك یا نێڤدەولەتی دا كەن.
