پتری دو مەهانە سنێلەیەكێ زاخۆ د قەفەسا بلبلان دا دنڤیت

زاخۆ، دلۆڤان هالۆ:

ل تاخێ گوندكی یێ سەر ب ئیدارەیا سەربخوە یا زاخۆ ڤە، پتری دو مەهانە سنێلەكێ 14 سالی د خانیەكێ كاڤل دا و د ناڤ قەفەسا بلبلان دا دنڤیت.
هەكار تەحسین، ئێك ژ ئاكنجیێن تاخێ گوندكی و شایەت حالێ بابەتی بۆ ڕۆژناما ئەڤرۆ دیار كر كو ژیێ ڤی سنێلەیی 14 سالە و د ڤێ قەفەسا بلبلان دا دنڤیت، ب ڕۆژێ ژی دەردكەڤیت و گۆت: «مالێن گەڕەكا مە هەرسێ دانێن خوارنێ ددەنێ و كەیفخوەش دكەن، ل گەل زاڕۆكێن گەڕەكێ یاریان دكەت، لێ دلێ مە گەلەك د مینیتە پێڤە و هێشتا كەسێ خۆ لێ نەكریە خودان».
عەبدولڕەزاق جاسم، ڕێڤەبەرێ چاڤدێری و گەشەپێدانا جڤاكی ل زاخۆ گۆت: «مە لیژنەیەكا تایبەت بۆ ڤی بابەتی پێكئینایە و دووڤچوونا بابەت دێ‌ كەت، داكو ئەگەرێن دروستبوونا ڤێ ڕوودانێ بزانین، هەر تشتەكێ پێدڤی دێ ژ لایێ مە ڤە هێتە كرن بۆ ڕزگاربوونا ڤی سنێلەیی ژ ڤێ قەفەسا بلبلان، چونكی مەترسیەكا مەزن ل سەر ژیانا وی هەیە».

کۆمێنتا تە