دەلیڤە بۆ یانەیێن پارێزگەهێ پەیدابوویە ڤەگەڕنە خولا ئیراقێ
شاهۆ فەرید:
د داخویانیەكێ دا سەرۆكێ فدراسیۆنا فوتبۆلا پارێزگەها دهۆكێ بۆ رۆژنامەیا ئەڤرۆ دیار كر دێ هەڤڕكیێن خولا پلا سێ یا ئیراقێ ل پارێزگەها دهۆكێ هێتە ئەنجامدان و هەموو یانە هاتینە ئاگەهدارن و چاڤەڕێ بەرسڤا واینە بۆ پشكداریكرنێ.
زێدەتر د. محەمەد سەعید گۆت: ل دووڤ پلانا ڕیكخستی یا فدراسیۆنا فوتبۆلا ئیراقێ بڕیارە ئەڤ سالە ب شێوەیێ كۆمڤە بوون بۆ هەر پارێزگەهەكێ قۆناغا ئێكێ یا خولا پلا سێیێ یا ئیراقێ بهێنە ئەنجامدان ژبۆ دەربازبوونا بەر ب قۆناغا دویێ، وەكو فدراسیۆنا فوتبۆلا پارێزگەهێ مە ژی دەست ب بەرهەڤیێن خوە كرینە و ئیكەم پێنگاڤ د كۆمبوونەكا بەرفرەهی دا دگەل یانەیێن پارێزگەهێ ئەوێن حەز هەی پشكداریێ بكەن، لەوما ژی دڤێ حەفتیێ دا ئەم چاڤەڕێ نڤێسارێن یانەیانە ئەوێن دێ پشكداربن و دووڤدا دێ جهـ و ژڤان و شێوازێ خول كۆما پارێزگەها دهۆكێ هێتە دەستنیشانكرن.
هەروەسان ناڤهاتی گۆت: لەوما ژی د ڤێ حەفتیێ دا دووماهیك ژڤانە بۆ وان یانەیێن حەزا پشكداریێ هەبیت دێ و پەیوەندی ژلایێ مە ڤە بوان هێتەكرن، هەرچەندە دیار نینە چەند یانە پشكداربن، دوور نینە ژی سیستەمێ یاریێ ژیی دێ لدووڤ حەزا وان بیت كەفتنا ئێك جاری یان خول بیت، ئەگەر هات و پێنچ یانەیان پشكداربوون دێ بتنێ ئێك یانە دەربازبیت و چەند رێژە زێدەبیت دێ پلیتێن دەربازبوونێ ژی هند زێدەبن.
ژلایەكێ دووڤە سەرۆكێ فدراسیۆنا پارێزگەهێ گۆت: هەموو بزاڤان كەین زوویترین دەم ئەم دەستپێبكەین و یانە خوە بەرهەڤبكەن، ئەڤە قوناغا ئێكێ دێ بڤی شێوەیی بیت پاشان ئەو یانەیا دەربازبیت دێ نوونەراتیا پارێزگەها دهوكێ كەت د خولا پلەیا دو یا ئیراقێ دا.
