رێڤەبەریا ئاڤ و سۆلینان دێ خوە ل داخوازیا تاخێ (ئێتیتا نوو) كەتە خودان
سندس سالح سلێڤانەیی:
هژمارەكا مالێن ئاكنجیێن تاخێ (ئیتیا نوو) ئەوێن ژ نوو هاتینە ئاڤاكرن، داخوازێ ژ رێڤەبەریا ئاڤ و سولینان دكەن چارەیەكێ ل ئاڤا وان بكەن و رێڤەبەرێ ئاڤ و سولینان ژی دبێژیت: هەر چەندە ئەو نەكارێ مەیە، بەلێ دێ د هەوارا وان چین و بۆ چارەكەین.
سوبحی یوسف هاوولاتیەكێ تاخێ ئێتیتا نوویە بۆ رۆژناما ئەڤرۆ گۆت: نوكە ئەم (12) مال یێ ل ڤێرە دژین، نێزیكی هەشت پارچەیێن ئەردی ژی هەنە و هێشتا نەهاتینە ئاڤاكرن، ئاریشەیا مە ئەوە دەمێ ئاڤێن مە دهێت گەلەكا بهێزە و هندەك جاران گەهشتیە وی رادەی كو بۆریێن مە دشكێن و یا خراپتر ئەوە ئەم ڤان بۆریان جارەكا دی ل سەر كیستێ خوە دكڕین و چێدكەین و ئەڤ چەندە ژی بۆ مە دبیتە بارگرانی.
خالد عەلی، ژی دبێژیت: ئەڤە گەلەك جاران مە پارە كۆمكرن و بۆریێن خوە بۆ چێكرن، حەزدكەین رێڤەبەرییا ئاڤ و سولینان بۆ مە ل چارەیەكا باش بگەڕیت چنكو هەموو هەیڤان مە ئەو شیان نیین ژ كیستێ خوە چێكەین.
ئەندازیار رێڤینگ عەلی ئەحمەد ژ رێڤەبەریا ئاڤ و سولینان ل دهۆكێ د بەرسڤا خەلكێ وی تاخی دا گۆت: هەر چەندە ئەڤە نە ئەركێ مەیە، ئانكو دەمێ كەسەك بۆ خوە خانیەكی ئاڤا دكەت پێدڤیە ئەو ب وێ چەندێ رابیت، لێ وەك هاریكاری دێ تیمەكێ خوە فرێكەینە وی جهی و ئەوا پێدڤی بیت دێ ژلایێ رێڤەبەریا ئاڤ و سولینان بۆ هێتە ئەنجامدان.
