فۆرمێن ئاهێن خوارنێ دێ بنە ئەلكترۆنی
هەولێر، قائید میرۆ:
رێڤەبەرێ گشتیێ بازرگانی ل حوكمەتا هەرێما كوردستانی راگەهاند، ل چەند رۆژێن داهاتی پرۆسێسا ب ئەلكترۆنیكرنا فۆرمێن ئاهێن خوارنێ ل هەولێرێ دێ هێتە دەستپێكرن و د دووڤ دا دێ هەموو كوردستانێ ڤەگریت.
نەوزاد شێخ كامل، رێڤەبەرێ گشتیێ بازرگانی بۆ رۆژناما ئەڤرۆ دیاركر، ئەڤ سالە دێ پرۆسێسا ب ئەلكترۆنیكرنا فۆرما ئاهێن خوارنێ كەڤیتە د بیاڤێ بجهئینانێ دا و ل چەند رۆژێن بهێن ل پارێزگەها هەولێرێ فۆرمێن ئەلكترۆنی دێ هێنە چێكرن و گۆت: “بەری نوكە ژی ل هژمارەكا پارێزگەهێن ئێراقێ وەكی تێست دەست ب چێكرنا كارتێن ئەلكترۆنی ل جهێ فۆرمێن ئاهێن خوارنێ هاتیە كرن و دێ ئەڤ پرۆسێسە ل سەرانسەری هەرێما كوردستانێ بڕێڤەچیت و هەر كەسەكێ كارتا نیشتمانی نەبیت فۆرما ئەلكترۆنی بۆ ناهێتە چێكرن”.
گۆتژی: “پشتی ب ئەلكترۆنیكرنا فۆرمێن ئاهێن خوارنێ دێ ب رێیا داگرتنا ئەپلیكەیشنەكی هەر وەلاتیەك زانیت چەند ماددەیێن خوارنێ هاتینە و ئەندامەك ژ هەر خێزانەكێ زێدەببیت یان ژی كێم ببیت، ب هەمان سیستەم دێ هێتە كێمكرن و زێدەكرن، ئەڤە ژی سیستەمەكێ پێشكەفتیە و دێ ئاسانكاریێن زۆر بۆ وەلاتیان كەت و ئیدی پێدڤی ناكەت وەلاتی بۆ برێڤەبرنا مامەلەیان سەردانا فەرمانگەهێن ئاهێن خوارنێ بكەن”.
