ئاوازێن قەبینەكا مەلویل
نایف مەحموود
ل بەر كەڤیێن بەفرێ و
ل ئاخلێڤەیا بهارەكا
ژ ڕەنگێ خوە كەتی..،
ئاوازێن قەبێنەكا مەلویل
ژ گەلالویچكا كەوێن بەر كەڤی و زناران دهێت..!
ڤێ ئاوازا دلێن شەوتی
سینگێ چیایان كەلاشت و پەلخاند!
قێژی و هەوار و حەسرەتان
ستویێ بەرخان دایە بەر كێران!
ژ هینگێ وەرە
زەنگا ژەنینا قڕێنا ئەسمانان
بارانا هەودانا كولێن
ل سەر گیانێ گولان شین بووین
زێدەكرن و سەرخوار و پوسیدەكرن..
ئاگرەك یێ كەفتیە
ڕهێن داربەڕویان
ئاخ و ئەمان و فیغانان یاخێن
كولیلكان یێن گرتین
ڕوباڕێن سەر ب ژێر و
ئاڤێن جوك و كانیان
ل هەمبێزا ستەم و جەفایێ
یێن پەنگین و
بێهنا قەتلازیێ یا كەفتیە پێسیرا ئاخێ
سەرهەڤسارێ راستیێ یێ كەفتیە
دەستێ ناخێن دلۆپەك ژ هەستێن مرۆڤبوونێ لێ وندابووی..؟
هێش كویڤیێن ل سەرێن لات و زناران ژ ترسا دێمجامەیێن قەسابان
ڕێكا خوە بو مستەكا ئاڤێ
نە ڤەگوهاستیە
سەرێ خوە بۆ چپكەكا بارانا ئەوران بلندكەن
بو فڕەكا ئاڤێ ژ كانیا دلۆڤانیێ ڤەخون..،
هێش ئازادیێ بەهەشتا مرۆڤایەتیێ باوەش نەكریە..،
ژ بەر كێلبێن گورگان و
ژ ترسا دڕندایەتیا هۆڤان
فهێتیێ كلوخێ ڕۆژێ یێ ڤەگرتی..
ئەلندێن ئەڤێ ڕۆژا كەربگرتی
د تارینە و تیرۆژكێن وێ ژی دخەما ڕا دڤەشارتینە!
ئەرێ هوین دزانن
ماكا ڤێ مژا كەفتیە بەرگێ ڕۆژێ و
ئەڤێ دویكێلا مەژیێ ستێران هنگافتی ل كیڤەیە و ژ كیڤە هاتیە؟
ئەرێ هوین دزانن
ڕەشاتیێ ددانێن خوە ل قولاچێن پەرستگەهان یێن قیچ كرین
ژبەر ئەوێ باوەریا د دلێ كەڤراندا زای، ژبەر وان سۆفیێن
دەستێن خوە ل هەمبەری بلندگوویێ مزگەفتان بلندكری و
لاڤایێن خوە ب دەنگەكێ نزم و بلند بو قیبلەیا كەعبێ ڕاكێشاین
ژبەر وێ خەنجەرا
ل پشت خوە ڤەشارتی و
كەفتینە سەر ڤەڕوتنا گوشتێ
فریشتەیان و ئاخێ بۆ ماچەكا حەرام دخون!
چ فێل و فێلبازینە
د هزرو گیانێ وەفایێ وەربووین
ل شوینا گرنژینا سحاریان
ل سەر لێڤێن زاڕۆكان
هستران باوەشا جان و جەستەیێ جانێن سالێ ڤەگرتیە و
خوین یا ژ گەوریا قولتەینا بێ دادیێ دهێت
نفرین و پەرستن
ل پەرستگەهان یێن تێكەل بووین
ل شوین دەستێن یەكسانیێ و دلۆڤانیێ
ڕحەك ژ قالبێ ڤیانێ ستریان دمێژن
عانە و بەریك ل سەر سینگێ
دەهمەن پیسان سەمایی دكەن
ب مەی و پێكان دلەیزن!
سەرخۆش و مەست د ڕەقسن!
ئەڤە و هندی تاسا دەستێ مروەتێ دكەرخا فەنایێ دا ب غولغلیت
نە برینێن مە دكەوهن
نەژی ئاخینك و خەمێن مە
ل گەل بایێ بیابانێ
بەر باهۆز و مشەخت دبن!
