دهۆك و نەورۆز سەركەفتن و زاخۆ و هەولێر تووشی خوسارەتیێ بوون
قەیس وەیس:
ب دووماهی هاتنا یاریێن گەڕا 14 ێ ژ خولا ستێرێن ئیراقێ یا فوتبۆلێ ئەنجامێن یانەیێن كوردستانی ب دو سەركەفتن و دو خوسارەتی بوون، یانەیا دهۆكێ بەردەوامی دا ئەنجامێن خوە یێن باش و یانەیا زاخۆ دەلیڤەیا سەرێ لیستێ ژ دەستدا و هەولێرێ پێشكەفتنا خوە نە پاراست و نەورۆزێ هێزا خوە ڤەگەڕاند.
ئەلهۆیێن چیا ئەلهۆیێن دەشتێ ڕاوەستاندن
تیما یانەیا دهۆكێ یا ناڤدار ب ئەلهۆیێن چیا شیان سەركەفتنەكا گرنگ ب شەش خالان ل سەر هەڤڕكا خوە یانەیا جەوییە ئەلهۆیێن دەشتێ بینت ب گۆلەكێ بێ بەرانبەر، دهاتە هژمارتن ئێك ژ یاریێن مەزن و پری جەماوەری ئەوا ل یاریگەها یانەیا دهۆك هاتیە كرن، گۆلا دهۆكێ ژلایێ ستێر و گۆلكەرێ وێ پاشەنگ ئەعبدوللا ڤە هاتە تۆماركرن، ئەڤێ سەركەفتنێ دهۆك پێشكەفتنەكا باش بەر ب رێزێن پێشیێ ڤە بر كو دبیتە یا حەفتێ د خولێ دا بەرانبەر سێ وەكهەڤی و چار خوسارەتییان ب24 خالان پێشڤە هاتە رێزا پێنجێ، بڕیارە سوبەهی یارییا خوە یا گەڕا 15ێ ببیتە مێڤانا یانەیا نەفت میسان یاریەكا دی یا بهێزە بۆ ئەلهۆیێن چیا و دێ بزاڤێن بەردەوامییا ئەنجامێن خوە یێن باش كەت.
گۆلكەرێن تیما دهۆكێ كینە؟
بۆ زانین حەفت یاریزانان پشكداری د تۆمار كرنا 18گۆلان دا هەیە بۆ یانەیا دهۆكێ و بڤی ڕەنگی، پاشەنگ عەبدوللا شەش گۆل، پیتەر گۆرگیس چار گۆل، هەر ئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، و كێلبرت كۆمسۆن گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
زاخۆ مفا ژ دەلیڤەیا سەرێ لیستێ نە وەرگرت
تیما یانەیا زاخۆ كوڕێن خابووری دەلیڤەیا سەرێ لیستێ ژ دەستدا پشتی دگەل مێڤانا خوە یانەیا كارەبا خوسارەتیەكا نە چاڤەڕێ كری دایی ب گۆلەكێ بێ بەرانبەر، د یارییا واندا ئەوا ل یاریگەها زاخۆ دناڤ جەماوەرێ وێ دا هاتییە كرن، ئەڤێ ئەنجامی وەكر زاخۆ هیڤیێن سەرێ لیستێ د گەڕا 14ێ دا ژ دەست بدەت و بزاڤێ بكەت بۆ گەرێن داهاتی ڤان هیڤییا ڤەگەڕینت، ژبەركو 25 خال هەبوون و هەكە ب سەركەفتبا دا چیتە سەرێ لیستێ ب جووداهییا گۆلان ژ یانەیا زەورا ئەوا ب سەركەفتی و مفا ژ خوسارەتییا زاخۆ وەرگرتی، كورێن خابوری ژ رێزا سێیێ پاشڤەچوو رێزا چارێ ب حەفت سەركەفتن، چار وەكهەڤی و سێ خوسارەتی هەنە، یارییا سوباهی دێ ژ دەرڤەیی یاریگەها خوە دگەل نەفت ئەلبەسرا بیت و چاڤ ل سەركەفتنێ بیت بۆ گەشكرنا هیڤیێن خوە.
حەفت یاریزانان پشكداری د گۆلێن زاخۆ دا كرینە
هەردو ستێرێن یانەیا زاخۆ یێ بەرازیلی گۆستاڤۆ هێنریك و یاریزانێ هەلبژارتیێ ئیراقێ ئەمجەد عتوان سەرێ لیستا گۆلكەرێن تیما خوە دهێن ب تۆماركرنا حەفت گۆلان، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە.
هەولێرێ خوسارەتییا پێنجێ دا و نەورۆز ڤەگەریا
ژلایێ خوەڤە تیما یانەیا هەولێرێ تووشی خوسارەتیێ بوو بەرانبەر یانەیا تەلەبە ب دو گۆلان بەرانبەر گۆلەكێ و دەلیڤەیا پێشڤەچوونێ ژ دەستدا، سەرباری تیما هەولێرێ ب گۆلەكێ یا پێشكەفتی بوو لێ تەلەبە ب ریمۆنتادا شیا سەركەفتنێ بینت، ژلایەكێ دیڤە نەورۆز ڤەگەڕیا سەركەفتنان ب گۆلا هێرشبەرێ خوە مەروان حسێنی بوو پێنجەمین سەركەفتن د خولێ دا ئەوا بەرانبەر كەرخ ب گۆلەكێ سەركەفتی.
ئەڤرۆ هەولێرێ یاری یا هەی
هەرچەندە دوهی دەست ب هەڤڕكیێن گەڕا 15ێ هاتنە كرن لێ بڕیارە ئەڤرۆ و سوبەهی یانەیێن كوردستانێ یاریێن خوە ئەنجامبدەن، یانەیا هەولێر دێ دێ ل پایتەختێ ئیراقێ بەغدا بیتە مێڤانا یانەیا كەرخ د یارییەكا گرن گدا ئەوا دێ ل دەمژمێر 2:30 پشتی نیڤرۆ هێتە كرن، ژ یاریێن دی، دیالا- ئەلكەرمە، نەجەف- مینا، زەورا- حدود، سۆبەهی دهۆك دێ بیتە مێڤانا نەفت میسان ل دەمژمێر 2:30 پشتی نیڤرۆ، نەفت دێ مێڤاندارییا نەورۆز كەت د هەمان دەم دا، ل یاریگەها فەیحا یانەیا زاخۆ دێ بیتە مێڤانا نەفت ئەلبەسرا دەمژمێر 7:30 شەڤ، هەروەسان كارەبا و تەلەبە دێ بەرانبەری ئێك یاریێ كەن.
هەلوەستێ گشتی پشتی بەری دەستپێكرنا گەڕا 15ێ یا خولا ستێرێن ئیراقێ بڤی شێوەیی یە.
1- زەورا 28 خال.
2- جەوییە 28 خال.
3- شورتە 27 خال.
4- زاخۆ 25 خال.
5- دهۆك 24 خال.
6- تەلەبە 24 خال.
7- نەفت 23 خال.
8- نەفت میسان 22 خال.
9- مینا 19 خال.
10- ئەلكەرمە 19 خال.
11- هەولێر 19 خال.
12- نەجەف 18 خال.
13- كارەبا 18 خال.
14- ئەلقاسم 18 خال.
15- نەورۆز 17 خال.
16- كەربەلا 15 خال.
17- نەفت ئەلبەسرا 14 خال.
18- كەرخ 12 خال.
19- حدود شەش خال.
20- دیالا چار خال.
