خەلكێ بادینان دلسۆزێن شۆڕەشا ئیلۆنـێ بـوون
بامەرنێ، سالار محەمەد دۆسكی:
2 – 4
لیستا ناڤێن مە ل گەل بوو و مە گۆت ئەو لیستە ل گەل دایە دەمێ هاتیە دەستەسەركرن، و هەر ئەو هەمی كەسێن ل گەل مە هاتنە ئاگەهداركرن و ئێكسەر ل ترۆمبێلەكێ سوار بووین، و دەمژمێر شەشێ ئێڤاری گەهشتینە باژێرێ مویسل و ئێكسەر ئەم چوویمە گەراجێ ئامێدیێ و شوفێران گۆتە مە دەمژمێر شەش رێك دهێتە گرتن د ناڤبەرا مویسل و دهۆك دا و هاتن و چوون نینە و دڤێت سوباهی سپێدێ بچی و ئێكسەر ئەم چووینە ئوتێلەكێ و هەتا بوویە سپێدە و هەر ئێكسەر چووینە گەراجی ب وێ مەرەمێ مە بگەهینتە ئامێدیێ، چوونا مە ب مەرەما پەیوەندی ب شۆڕەشێ بوویە، چونكە شانا مە ئاشكرا بوویە لێ ئەم نەشییێن بێژینە شوفێری بابەتی من گۆتێ ئەز و كورخالێ خوە دێ چینە (تەژنیدێ) ئەڤێن ل گەل مە دو شاهدن و موختارە و هەر زالگەهەكا مرۆڤ گەهشتبایێ ناڤێن هەمیان دنڤێسان، و كا دێ كیڤە چن و ئەم گەهشتینە سوارەتوكا وی دەمی جادە نەبوو و چەند چەپ بوون و هەتا گەهشتە نێزیكی كورەماركێ وی دەمی دو رەبیە ل چیایێن سوارەتوكا بوون و ئێكسەر من گۆتە شوفێری راوستە ل ڤی جهی من گۆتێ ئەم دێ هێنە خوار، شوفێری گۆت چەوا ناڤێن هەوە ل زالگەهان هاتیە نڤێسین و دێ پرسیارا هەوە ژ من هێتەكرن و من گۆتێ ئەگەر نەراوستی دێ ب دەستێن مە هێیە قوتان و دێ هێینە خوار و ئێكسەر راوستیا و گۆت هەرن و ئەم ب پیا چووینە سپنەی، و دوڤدا چووینە (داودیێ) ئەڤە هەیڤا تەباخێ یە سالا 1968ێ و ئەم چووینە مالا (مەنسور عەبوو) ئەم پێنچ رۆژا ماینە ل (داودیێ) و بتنێ ئەز ئەرەدنی بووم، و ئەڤێن دی هەمی خەلكێ (تنێ) بوون لێ خالێت من بوون، و (یوسف برایێ مەنسور) پێشمەرگە بوو ل گەل (فارس كورەماركی ) و بارەگایێ وی ل (وەرمێلێ) بوو سەری، ئەم هەشت كەس بووینە ل ڤێ مالێ و مە گۆت ئەم دێ چینە ناڤ پێشمەرگە وی دەمی (عەلیێ خەلیل) ل گوندێ (گەلناسكێ) بوو، و ئەم نەشارەزا بووین و دڤێت ب شەڤ هاتن و چوون بهێتەكرن، چونكە ب رۆژ فرۆكە رەمیێ ل مرۆڤان دكەن و مە ژڤان بخوە دروستكر كو دەمژمێر هەشتی شەڤێ بدەینە ڕێ و (یوسف مەنسور) بوو رێبەرێ مە و ئەڤە رێكەك بوو ئەم بچینە ل گەل هێزێن (فارس كورەماركی)، وی دەمی مرۆڤێن مە ل گوندێ مێسكا بوون ل دەڤەرا بەرواری یا و خال و كورخالێت من گۆت نەچیە ئەردانا ژین و مرن دێ پێكڤە بین، و ئەم ل گەل (یوسف مەسنور) دێ چینە (گەلناسكێ) و مە هەشتی شەڤێ دا رێ وێ شەڤێ هەمیێ مە ب پیان دا رێ و بەرێ سپێدێ ئەم گەهشتینە گوندێ(گەلناسكێ) وی دەمی بارەگایێ (عەلیێ خەلیل) وێرێ بوو و دەمی ئەم چووین بارەگایێ وی تژی مرۆڤ بوو، و گۆتن هوون كینە؟ مە خودا نیاسین و بابەت مە شرۆڤەكر و ئێكسەر دەنگوباسێ گەهشتنا مە بۆ پێشمەرگە بۆ ئێزگێ كوردی هاتە بلندكرن، و كاغەزدەك دامە بۆ وەرگرتنا ئەرزاقی و كاغەزەك بۆ وەرگرتنا چەكی و دڤێت بچینە (ئارت و بانكا) بچین توڤچای و شەكرێ وەربگرین و بۆ ئاری بچینە (كانی بەلاڤێ)، ئەڤە هەمی ب پیان و ئەم چووین مە ئەرزاق وەرگرت و ئەم ل گەل (فارس كورەماركی)، دوڤدا ئەم چووین مە بارەگایەك ل گوندێ (زێوا شێخ پیراموس) چێكر وی دەمی لبنێ چیایی بوو، و ئەم ماین هەتا دەسپێكا سالێت حەفتێ و ئەم هەر سەر ب (فارس كورەماركی) و مرۆڤەكێ گەلەك باش بوو، پشتی بەیانا 11 ئادارێ بارەگایێ لقێ ئێك ل نەبی یونس هاتەدانان ل مویسل و (عەلی شنگالی) بەرپرسێ لقێ بوو و گازیەك بوو، من ژلایێ وی ڤە هات كو دڤێت ماوێ 24 دەمژمێران ئەز ل بارەگایێ لقێ ئێك بن وی دەمی من دەستیردانا ترۆمبێلێ هەبوو، و گۆت ببە شوفێر ل گەل من و رازیبووم و من گۆتێ بلا سەیدا، گۆت بیژە خال یان كاك عەلی و گۆت ببە زێرەڤان و شوفێر ل گەل من و ئێك هەبوو ژی بناڤێ عومەر خەلكێ كەركووك بوو ئەو ژی ل گەل بوو وەك زێرەڤان و ئەم ل گەل ماین، و خودێ ژێ رازی (عەلی شنگالی) مرۆڤەكێ گەلەك تۆڕە بوو، ل هەیڤا هەشت بۆ نەه دو هۆزان هێرشكرنە بارەگایێ لقێ ئێك ل مویسل و (عەلی شنگالی) بروسكەك لێدا دكێمتر دەم دا بارەگایێ لقێ تژی پێشمەرگە بوو، وی دەمی نە گۆتنێ پێشمەرگە دگۆتنێ لەشكر ل شۆڕەشا گولانێ ناڤێ پێشمەرگەی هاتیەدانان و ئەم بەردەوام چووینە (ناوپردان) بۆ ئەنجامدانا كومبوونان ل گەل (بارزانیێ نەمر)، (عەلی شنگالی) ئەندامێ لژنا ناڤەندی بوو یا پارتی و بەرپرسێ لقێ ئێك بوو، و جێگرێ پارێزگەرێ دهۆكێ ژی بوو وی دەمی (هاشم عەقراوی) پارێزگەر بوو، و هەر دو پارتی بوون و ئەندامێن لژنا ناڤەندی بوون و باوەرناما (هاشم) بلندتر بوو لەوما ئەو ببوو پارێزگەر، رۆژەكێ ژلایێ جەنابێ (بارزانی) ڤە هاتینە ئاگەهداركرن، (عەلی شنگالی) رۆژەكێ گۆتە من دا بچینە دا پارێزگەها نەینەوا وی دەمی ئەویێ هوسا بوو گەلەك حەز نەدكر مرۆڤ ل گەل بن وەك زێرەڤان و بتنێ ئەز و كاك عومەر ل گەل بووین وی دەمی (هاشم عەقراوی) پارێزگەرێ دهۆك سێ ترۆمبێلێن زێرەڤانان ل گەل بوون و دو بەرێ چوون و ئێك ل پشت چوو و (عەلی شنگالی) یێ هوسا نەبوو و بتنێ ئەم دو ل گەل بووین و هەر دەم دگۆت ئەڤە مشكلە نە بۆچی هندەك زێرەڤان و ئەگەر بچیە جهەكی دڤێت خوارن و ڤەخوارن و نڤستێن ئەڤان هەمی مرۆڤان دابین بكەین و مامە چ ئاریشە هەیە ئەم ئەڤان هەمیان ل گەل خوە بگێرینین، بتنێ (عەلی شنگالی) ئاریشە ل گەل دو هۆزان هەبوو و یێ هشیار بوو ژ مویسل هەتا كەلەكا (یاسین ئاغای) ئەم گەلەك هشیار بووین و هەتا چەكێ مەیێ ئامادەبوو و و دەمێ ئەم چووینە (ناوپردان) ب رێكێ ڤە ل چەیخانەكێ مە جلكێن كوردی دكرنێ و ئەم شنی چووینە جڤاتا (بارزانی) و دا بزڤرمە ئاخفتنا خوە و پشتی ئەم چووینە دیوانا پارێزگەهێ ل مویسل مە پارێزگەر و ئامرێ فرقا سێ دیتن و گۆتە (عەلی شنگالی ) وەر ل گەل مە ترۆمبێلێ دا.
