تێهزرین د ڕوبارەكی دا
ئەحمەد خالد تەوفیق
كوردیكرن:
محسن ئەبدولڕەحمان
بیرا من ل چیرۆكەكا ئەندرێ مورۆ لدۆر هونەرمەندەكێ داهێنەرێ كەڤالەكێ خۆ نەفرۆشتی هات، هەڤالەكی وی یێ رۆژنامەڤان سەرەدانا وی كر و بۆ رەوشا وی خەمگین بوو، لەورا بۆ پێشنیاركر، كو بێژیت ئەوی شێوازەكی نوی د هۆنەری دا داهێنایە و ب (شێوازێ دەروونناسییا شرۆڤەكاری) ناڤكرییە.
«تو دشێی بۆ من چەند كەڤالەكێن هندەك تشتێن پویچ نیكاركەی؟ بۆ نموونە ژنەك و ل رەخێن وی پارێن كاغەزی، ئاماژەكرن بۆ حەزژێكرنا ژنێ بۆ زەنگینیێ، یان زەلامەكێ قەلەو دبەرخۆراچووی ل دۆرا وی ڕۆندك و (خوین) هێماكرن بۆ دەولەمەندێن (ش ە ر ی)…دشێی دكەی؟»
– « هەلبەت».
– « ڤێچا دەهـ كەڤالان ب ڤی شێوەی چێكە، پاشی دێ گۆتارەكێ ل سەر ڤێ شێوەیێ تە یێ بلیمەت و پیشانگەها تە یا داهاتی نڤێسم».
هۆسا هونەرمەندی ئەڤ پویچییە د شەڤەكێدا ئەنجامدا و ڕۆژا پیشانگەهێ هات، كو بۆ تەماشەكرنێ پاریس هەمی لێ كۆمبوون، ل وێدەرێ كۆمەكا رەخنەگرێن هونەری ئامادەبوون، ئینا رۆژنامەڤانی گۆتە هونەرمەندی:
« نەترسە.. چەند ئێك لدۆر رامانا (شێوازێ دەروونناسییا شرۆڤەكاری) ژ تە پرسی، هەما دویكێلا قەلوونا خۆ بەردە دێمێ وی و بێژێ: د ژیانا خۆدا تە تێهزرین د ڕوبارەكی دا كرییە؟ ئەو دێ تێگەهشتنێ ل خۆ دیاركەن»!
هونەرمەندی رێنما بجهئینان، چەند ڕۆژمەنامەڤان یان رەخنەگر لدۆر زڤریبان و لدۆر رامانا شێوازێ وی ژێ پرسیبان، دویكێل بەرددا دێمێ وان و دگۆت: هەوە د ژیانا خۆدا تێهزرین د ڕوبارەكی دا كریە؟»
هۆسا ب حێبەتی هاواردكرن:
– «ئەڤە راستە.. چ بلیمەتە»!
پیشانگەهـ بدوماهی هات پشتی هەمی كەڤال ب بهایێن گران هاتینە فرۆشتن و هونەرمەند بۆ گرنگترین هونەرمەندێ پاریسێ.
پشتی چوونا خەلكی ب كەنیڤە رۆژنامەڤان هات و گۆت:
« تە دیت چاوا ب كەڤالێن تەیێن بێ بها مە ئەو خەلك خاپاند؟
هونەرمەندی ب رژدی لێ نێری و گۆت:
– «ئانكو تێبگەهم كو تو رەخنەیا شێوازێ من یێ دەروونییا شرۆڤەكاری دكەی؟»
رۆژنامەڤانی ب هێرسی هاواركر:
– «دێ!… تە ژ خۆ باوەركر، تو دزانی تشتەك بناڤێ (شێوازێ دەروونییا شرۆڤەكاری) نینە.»
هونەرمەندی بەرێخۆدایێ و دویكێلا قەلوونێ بەردا دێمێ وی و گۆت:
– «د ژیانا خۆدا تە تێهزرین د ڕوبارەكی دا كرییە!؟»
