گــرێ خـەمـــا
رەمەزان ئیسماعیل گەرەگوهی
تو..
مێزەكە ئەڤی گری
ئەڤێ هەمی
پویش و پەلەخ
ب دەغەل و داسی و ستری
گول و كولیلكێن وی زەربووین
پیتانۆك و
ئادارۆكێن وی چرمسین
گیایێ وی هشكبووی و
هەمی قەمغی و كوزری
تەڤ بالندە و ئاشقێن وی
هەمی ژێ چووین
باژێلە بووین
ژێ فڕدای و ژێ باركری
خوەزی..
بتنێ تە زانیبا
ئەڤی گری..
ددەمــەكی دا
چەند خزمەتا مە یا كری
من و دۆست و هەڤالێن خوە
چەندین جارا
ئاگرێ گەشێ نەڤرۆزێ
یێ ل سەر سەرێ وی هەلكری
مە بێهنا خوە
بكەیف و خوەشی
ل ڕۆژێن كەلێژان و گەرم
ل بن سیبەرا تڕاشێن وی
یا ڤەكری
مە نیڤەكا ژیێ خوە یێ
ل سەر بۆراندی و
یێ لێ بری
ل بن ڕزدە و شكەفتێن وی ڤە
مە چەند سالا
جانێ خوە یێ لێ پاراستی و
ژ ترس و برسێ قورتالكری
مە پڕچا خوە
ئەوا ڕەشا مینا تەنیێ
ل هەمبەری وی یا سپیكری
گەلەك جاران..
نەخاسمە ل ئێڤاران
بلبلەكی..
دەمێ ل سەر
تاك و چەقێن ئەڤان داران
ب ئاوازەكا خوش و نازك
هەر دستری..
ئەڤی گری
گەلەك جاران
ناخێ مە یێ تەنا كری
دلێ مە یێ
بەختەوەر و ئارام كری
خەما مە یا هەری مەزن
یا بچویك و سڤك كری..
بۆ دەمەكی
ژمە دایە پاش و دویركری
ل دەردورێن ئەڤی گری
من پەرتووكا
هندی سەرهاتی و چیڕۆكا
ئەڤینداریا مەم و زینێ
لاپەڕ لاپەڕ
هەمی یا خواندی و ژ بەركری.
