ئێكەم دیدارا هەژار موكریانی ب ناڤێ هەژار و زمان بڕێڤەچوو
هەولێر، قائید میرۆ:
ب بەرهەڤبوونا سیداد بارزانی، نوونەرێ سەرۆك بارزانی و هەژمارەكا ئەندامێن مەكتەبا سیاسی و كۆمیتەیا ناڤەندیا پارتی و زمانزان و ڕەوشەنبیر و نڤیسەران، دوهی رۆژا شەمبی 22/2/2025 ئێكەم دیدارا هەژار موكریان ب ناڤێ (هەژار و زمان) ل باژێڕێ هەولێرێ بڕێڤەچوو، دیدار ژ لایێ پشكا ڕەوشەنبیری و راگەهاندنا پارتی دیموكراتی كوردستان هاتبوو رێكسختن و بڕیارە سالانە ئەڤ دیدارە بهێتە ئەنجامدان.
دكتۆر سالار عوسمان، ئەندامێ كۆمیتەیا ناڤەندیا پارتی و بەرپرسێ پشكا ڕەوشەنبیری و راگەهاندنا پارتی دیموكراتی كوردستان گۆتارەك پێشكێش كر و تێدا گۆت: “ئێكەم دیدارا هەژار موكریانی یا تایبەتە ب هەژار و زمان، هەموو پانێلێن هاتینە پێشكێشكرن ل دۆر زمانی بووینە، زمان و كورد، زمان و دیرۆك، زمان و هەژار، زمان و ئایندە، زمان و زیرەكیا دەستكرد و زمانێ ئێكگرتیێ كوردی و ئاستەنگێن هەمبەر زمانێ كوردی. بابەتێ دویێ: هەژارێ بلیمەت و دانا و زانایە، هەژار ئێكە ژ وان كەسێن گرنگ یێن كوردان، كو دشێین ناڤێ وی بكەینە هەژارێ فرە رەهەند و هەژار ئەتلەسەك بوو ل نڤیسین و هزركرنێ، ئەگەر بخوازین ل سەر هەژار باخڤین ئەڤە پێدڤی ب رێزبەندیێ هەیە، بۆ نموونە: هەژار و شعر، هەژار و پەخشان، هەژار و سیاسەت، هەژار و دینداری، هەژار و وەرگێڕان، هەژار و ب دەهان بابەتێن دی، پشكا رەوشنبیری و راگەهاندنا پارتی ب ئەركێ خۆ دزانیت، هەر سال مژارەكێ بكەتە دیدار، ئەڤ سالە دیدارا هەژار موكریانی ل دۆر زمانیە، سالا بهێت دێ مژارەكا دی بیتە دیدارا هەژار موكریانی و هەموو بابەت ژی دێ بنە پەرتووك”.
دكتۆر سالار عوسمان گۆتژی: “ئەڤرۆ ئەم یێ بیرئینانا مرۆڤەكێ مەزن دكەین، هەموو ژییێ خۆ بۆ پەیڤ و كوردایەتی و ئەدەب و سەرڕاستیێ تەرخان كربوو، ئەم یێ بیرەوەریا مرۆڤەكی دكەین، زارۆكێن كوردان ئێخستنە د ناڤا فەرهەنگەكا راست و وەرگێڕانا دروست و شعرا روون و ئایندە دیتنێ دا بۆ كوردستانێ، ئەم یێ بیرەوەریا كەسەكی دكەین ل نك بارزانیێ نەمر گۆتە هەموویان، ئەڤەیە رێبازا دروست یا كوردایەتیێ”.
خانی هەژار موكریانی، كوڕێ هەژار موكریانی ل دۆر ئێكەم دیدارا هەژار گۆت: “گرنگیا ئەنجامدانا ڤان جۆرێن دیداران ل دۆر كەسایەتی و بەرهەمێن هەژار موكریانی، گرنگیا خۆ هەیە، هەژار زۆر كارێن گرنگ بۆ تورەیا كوردی ئەنجامداینە، دەستخۆشیێ ل ئەنجامدەرێن ئەڤێ دیدارێ دكەم و هیڤی دكەم بەردەوامی هەبیت، ب نوونەرایەتیا مالباتا هەژار موكریانی سوپاسیا هەمیان دكەم و نڤیسەر و رەوشەنبیر دشێن د بیاڤێن جودا دا پشكداری هەبیت، چونكی بەرهەمێن مامۆستا هەژار موكریانی بۆ ئەڤرۆ و داهاتی ژی گرنگیا خۆ هەیە”.
