خاچڤانێ خاچا خەباتێ
خورشید توفیق باكۆزی
تو ئەوێ تو
دناڤ پەراسیێن گارەی دا
بوویە گارە و
دلێ تە كەڤیەكا بەفرێ و
سینگێ تە سەنگەر و قەلغان..
«ئاتۆشا تە»
هێژ كاڤلەكێ جەرگ سۆتییە و
بێهنا كادیێ یا ژێ دباریت.
بێهنا كادیێ ژهناڤان تێت.
«دایی وەردە» یابوویە بەندا ئاخینكا و
هەموو ڕۆژێ ئاوازەكا زێماری دبێت.
هەموو ڕۆژێ یا مەشكەكا
كول وژان و كەسەران دكێت.
«دایی وەردە» بەندا ڕۆژێ یە.
مامێ «ئیسحاق»
خاچڤانێ خاچا شۆڕشێ
«ئەبلەحەد»ێ جوانەمەرگ.
ستێركا سۆبا ئازادیێ دسینگێ وەدا
هەر یا گەشە و ناڤەمریێت..
نەه بیتانۆكێن بهاری.
ئەڤە سەرێ چەند سالانە
ل مژا مرنێ ل بیابانێ
ل بەر پێ و پەلێن ڕەشەبایێ
ئەوێ شەڤا شەڤ خڕیانێ
ل پەنجێن زۆلماتا قڕكرنێ.
لێ هەوارە و
فڕەكا ئاڤا كانییا و
فڕەك ژبایێ بەركەڤییا و
پەڕمویچكەكا بەفرێ دڤێت.
ئەڤە سەرێ چەند سالایە
هەناسا گارەی هەر یا تەنگە و
هەلەموڕ و بێهنا قەمیانا ئەنفالێ
بەرنەدایە.
چەلێ بلندێ «سێدەرا» بڕینا وی
كاركنییە و
سەرێ وی ئاگر و دوییە و
برینا وی هێژ یا گەرمە و
ژانەكا ب ژان و هەودایە.
مامێ «ئیسحاق»،
خاچڤانێ خاچا شۆڕشێ و
كرنۆش بەرێ كوردینییێ
وێ ڕۆژا من تو ناسكری
بەفر مربەتا مێران بوو
تاریڤان و شەڤپەرێسێن شەڤا وێران
هەناسا ڕۆژێ دهنگافت و
شەڤ سۆلتان بوو..
بەلێ تو مەردەڤانێ ئازادیێ بووی
كۆچكا تە یاپڕی رێڤنگ و مێڤان بوو
لەورا ژی هەتا ئەڤرۆ
بەژنا گارەی لبەر بەژنا تە یا ژخوە شەرمە و
هەردەم یاخویل و چەمیایە
رۆندكێن وی دكوور دا دباڕن..
ل دیندار و داربەڕویێن واری و
ل كەڤر و زناران نالینە
ل بەرز و بلندیا ئاسۆیێ
ناڤێ تە هەر بەرز دمینە و
دلێ تە نەخشێ وەلاتە و
خوینا تە رەنگێ ئالایە..
خوینا تە رەنگێ ئالایە..
