دەهـ مایكرۆ – چیڕۆك
شەمال ئاكرەیی
(١)
پزیشك
هەر رۆژ روبارێ ژیانێ دهوڕتە د دەریایا ژبیركرنێ دا و خۆ ل مە ناگریت. ئەم ل بەندێ بووین هەتا رۆژەك بهێت مە ژی ل گەل خۆ ببەت! بەلێ، ئەڤرۆ سپێدێ، پشتی پزیشكی دوماهی تێستێن گشتی یێن نەخۆشییان دیتین، گۆتە من، هشیار بە روبار یێ بلەزتر لێهاتی!
(٢)
ساچمە
ئەندازیارەكی د خواست، ئەو دەمێ بوویە ساچمە، ب چەسپێ بگەهینتە هەڤ. بەلێ دیت، كو هەر ساچمەك یا د لەشێ شەهیدەكێ ئازادیێ دا چوویە خوار.
(٣)
وێرەكی
ئەو دەنگێن زوی پەیدا دبن و دمرن، چ گوهـ پێشوازیێ لێ ناكەن. هەمی گوهان وێرەكی یا ژ دەستدای!
(٤)
هەمبێز
فرۆشكارا هەنێ، ب لەشێ خۆ خۆشی و گەرمی دفرۆشیتە برسیێن هەمبێز ژ وانڕا زیز. دوهی ئەز ژی بكڕبووم.
(٥)
سانسۆر
ئەوێ ب سانسۆرییا پەیڤان رادبوو، هەمی رامان د بێدەنگیێ دا دپەنگاندن، هەتا لەهییەكا ب هێز ژێ رابووی!
(٦)
كەڤۆك
من ئەو خەونێن پرتپرتبوویی، هەمی لێكدانەڤە، هەر خەونەكێ كەڤۆكەكا سەرژێكری ژێ بلندبوو، هەوارێن خۆ بۆ ئەسمانی برن.
(٧)
هەناسە
من هەمی هەناسەیێن خۆ یێن ب ئاخینكان باركری، كرنە گلواز و ل سەر رستكا بێدەنگیێ هەلواسین.
(٨)
هەلبەستڤان
هەلبەستێن وی یێن ب سەنگ دناڤ زكێ دیوانێن وی دا بێبەها مان. بەلێ (وی یەكێ دی) ب هەلبەستۆكێن خۆ یێن بێبەها هەر رۆژ یێ ل سەرێ ژووری!
(٩)
تێبا*
ب سالێن درێژ تێبا ب رێكوپێكی دڤەهاندن و دكرنە سەهم و گەف و خۆ پێ دترساند!
(١٠)
پەیكەر
پەیكەرەكێ نایاب دروستكر. گەلەرییا باژێڕی، ب بەهانەیا “بەرهەمێ ئارەزومەندایە” ژێ وەرنەگرت!
…………….
* كابیس
