یاریزانێن زاخۆ و تەناهی رێزێن ئێكێ ب دەستڤە ئینان
قەیس وەیس:
ب دووماهی هاتنا هەڤڕكیێن قارەمان بۆمسی یا ئیراقێ بۆ یارییا تایكواندۆیێ یاریزانەكێ یانەیا تەناهی و سێ یاریزانێن كوڕ و كچ یێن یانەیا زاخۆ رێزێن ئێكێ و سێیێ ب دەستڤە ئینان، د هەڤڕكیێن واندا ئەوا ب پشكدارییا 12 یانەیان ل هۆلا گرتییا شەعب پایتەختێ ئیراقێ بەغدا مێڤاندارییا وێ كر، ئەنجامێن یاریزانێن پارێزگەهێ بڤی رەنگی بوون.
ل سەر ئاستێ لاوان بۆ كێشا 63 كگم، یاریزانێ یانەیا تەناهی عابد نەوفەل عابد شیا رێزا ئێكێ بهێت و میدالییا زێری ب دەستڤە بینت، ل سەر ئاستێ تازەپێگەهشتییان بۆ كێشا 47كگم كچا یانەیا زاخۆ ئستەبرەف دلگەش محەمەد شیا رێزا سێیێ بهێت ب میدالییا برۆنزی، ل سەر ئاستێ لاوان بۆ كچان هەردو هەڤالێن وێ هەدیل مەهدی بۆ كێشا 44 كگم و ئاستێ كوڕان غالب فاخر بۆ كێشا 45كگم رێزێن سێیێ هاتن ب دەستڤە ئینانا میدالیێن برۆنزی.
ل دووڤ ڕاگەهاندنا فدراسیۆنا تایكواندۆیا ئیراقێ ئەو یاریزانێن رێزێن ئێكێ و دویێ دهێت دێ بۆ ناڤ رێزێن هەلبژارتیێ ئیراقێ هێنە ژێگرتن پێخەمەت پشكداری د قارەمانیێن ئاسیایی و عەرەبی دا، ئەو یاریزانێن رێزێن سێیێ دهێت وەكو پێكهاتیێ یەدكەت دێ دگەل هەلبژارتیێ ئیراقێ بن هەردەما پێدڤی ب وان بوون دێ هێنە گازی كرن.
بۆ زانین هەر ئێك ژ یانەیێن، تەناهی، زاخۆ، ئەمانە بەغدا، كۆت، عەدل، موفەقییە، ئەلعەرەبی، بیلادی، شەباب، سمۆد، شەرقییە و تاڕمییە ل سەر ئاستێن كوڕان و كچان پشكداربوون.
