ئەگەر پەیاما ئاشتیێ ببیتە پرۆژەیێ ئاشتەوایێ
غیاس خـالد زێباری
ل رۆژا 17 ێ سوباتا 2025 رێبەرێ زیندانیكریێ پەكەكە عەبدوللا ئۆجالان پشتی سەرەدانا شاندنێ ئیمرالی و كۆمبوونەكێ، پەیامەكا گرنگ و دیرۆكی راگەهاندن، ئەو ژی چەكدانا چەكدارێن پەكەكێ و هەلوەشاندنا پەكەكێ وەك حزب، ئەڤ پەیامە ل دەمەكی هاتە راگەهاندن كۆ پارتیا كاركەرێن كوردستانێ ( پ.ك.ك) پشتی بۆرینا 47 ل سەر دامەزراندنێ و 41 سالا ب سەر راگەهاندنا چەكداری، نەشیای بگەهیتە كێمترین ئارمانجێن خوە و گەلێ كورد ل باكوور و گۆرەپانا چالاكیێن وان یێن چەكداری ژی ل سنوورێ وان دووركرن بەرەڤ بەشێن دیتر یێن كوردستانێ ب تایبەت ل باشوور، دەولەتا توركیا دەلیڤەیەكا ئاشتیێ و چارەسەریێ بۆ پەكەكێ و باكوورێ كوردستانێ دابینكریە و بۆچوونێن ئالی و جهێن پەیوەندیار هاتینە وەرگرتن ژ وانا سەرۆك مەسعود بارزانی و سەرۆكێ هەرێمی و سەرۆكێ حوكمەتا هەرێمێ و باڵێ چەكداریێ پەكەكێ ل قەندیل و …. و پارتیا وەك هەڤیا گەلان ( دەم پارتی ) وەكی نوونەرێن كوردان ناڤبەینكارن د ناڤبەرا دەولەتا توركیا و ئۆجەلانی دا بۆ پرۆژێ ئاشتی و چارەسەریێ ئەوێ ژلایێ سەۆكێ ( جەهەبێ) كۆ توندڕوترین پارتیا نەتەوە پەرستا توركیا یە هاتیە پێشنیاركرن .
ئەو پێشوازیا خەلكێ كوردستانێ ب تایبەت ل باكوور و سازیێن نیڤدەولەتی و وەلاتێن جیهانێ ل ڤێ پەیاما ئاشتیخازیا ئۆجەلانی هشیاریە بۆ چەكدارێن پەكەكێ كو نەشێن ب رەفتارێن بەرێ خزمەتا گەل و وەلاتێ خوە و جڤاكێ توركیا ب گشتی بكەن و سەردەمێ برایەتیا گەلانە ل وی وەلاتی و جیهان پشتەڤانیا ڤێ چەندێ دكەت . ئەگەر پەكەكە نەخاسمە بالێ چەكدار ل قەندیلی گۆهداری بكەت و دەولەتا توركیا ژی ئەرێ بكەت، پەیاما ئاشتییا یا ئۆجەلانی دێ بیتە پرۆژەیەكێ ئاشتەوایی یێ دۆمدار ل توركیا و خزمەتا گەلێن توركیا و پاراستنا برایەتی و پێكڤە ژیانا وان كەت و ئێمناهی و سەقامگیری دێ بۆ گەلێ كورد ل باكوور ڤەگەرێت و هەرێما كوردستانێ و دەولەتێن هەرێمی ژی دێ سەقامگیرتربن، چونكی رێكخستن و چەكدارێن پەكەكێ ئاسایش و سەقامگیریا وان تێكدایە و زۆر جارا دەستێوەردانا دكەن . ب هەر رەفتارەكا بەرۆڤاژی یا چەكدار و رێكخستنێن پەكەكێ، دەلڤەیەكا زێرینا خەلكێ باكوورێ كوردستانێ دێ ل دەست چیت و رەوشا پەكەكێ ژی ژلایێ جەماوەری و سیاسی و دارایی، دێ زۆر لاوازتر بیت و دبیت ئەو وەلاتێن پشتەڤانیا ڤی پرۆژەی دكەن دژایەتیا وان بكەن و رێ بۆ دەولەتا توركیا ژی دێ ب ساناهیتر بیت بۆ كریارێن لەشكری.
