ل شێخان شۆفێر ب شەڤ سرایێ دگرن داکو بشێن 40 لترێن پانزینێ وەربگرن
شێخان، بارزان مزووری:
شوفێرێن قەزا شێخان ژبەر كێمیا بەهرا شێخان ژلایێ ئیدارا نەینەوا یا پانزینێ شوفێر ب شەڤ سرایێ دگرن دا بشێن ب رۆژ 40 لترێن پانزینا 450 دیناری وەرگرن ب كوبون كو بۆ ماوێ سێ رۆژا جارەكێ دشێن وەرگرن داخواز دكەن بەهر وان بهێت زێدەكرن یان ب شەڤ رۆژ وێستگەهێن پانزینێ بهێنە ڤەكرن.
محەمەد نوری، شوفێرەكێ شێخان بۆ رۆژناما ئەڤرۆ دیاركر، گەلەك جاران سرایێ دگرین دێ چینە بەر مزاخێ دێ بێژن بەنزین خلاس یا كارەبا گشتی چۆ مە موالیدە نینە پانزینێ بەلاڤ بكەین، ل وی دەمێ 40 لترێن مە د سوزن دێ خۆ گرین هەتا سێ رۆژێن دی وەكۆ هەر جار دێ سرایێ گرین هەتا 40 لترا وەرگرین ئەڤە چەندین سالە ئەڤە رەوشا خەلكێ شێخانە، داخواز ژ پەرلەمانتارێن پارتی ل بەغدا دكەین كار بكەن بۆ زێدەكرنا بەهرا شێخان یان ژی هندەك وێستگەها دەست نیشان بكەن كو ب شەڤ رۆژ ڤەكری بن، وەكو نەینەوا شەڤ رۆژ پانزین یا هەی بتنێ دەڤەرێن كوردنشین سرایا پانزینێ یا هەی.
زیاد عوسمان، شوفێر بۆ رۆژناما ئەڤرۆ دیار كر، داخواز ژ نوونەرێن مە یێن كورد ل پارێزگەها نەینەوا ئەوە كار بكەن بۆ دابینكرنا بەهرا شێخان ب دروستی، ژبەركۆ ئەڤە مافێ مەیە و بەهرا مەیە بۆچی ب دروستی ناهێت و بوچی ل مووسل ب شەڤ رۆژ وێستگەه د ڤەكرینە بێ سرایە و بۆچی شێخان ب تنێ سرایە مانە مافێ مەیە ب شەڤ رۆژ ڤەكری بن .
كاڤین شێخ سەعید، پەرلەمانتار ل پەرلەمانێ عێراقێ ژ لژنا سوتەمەنیێ ل بەغدا بۆ رۆژناما ئەڤرۆ دیار كر، ب نڤیسارێن فەرمی مە داخاز كریە بەهرا شێخان بهێتە زێدەكرن و وێستگەهەك بهێت دەست نیشانكرن كۆ ب شەڤ رۆژ یا ڤەكری بیت دا ئەڤ سرایە نەمینیت شوفێر بێزارنەبن و هەتا بشێن بەهرا خۆ یا پانزینێ وەرگرن ژبەركۆ مافێ وانە كار ئاسانی بۆ وان بهێت كرن وەكۆ باژێرێ مووسل .
سەردار یەحیا ،قائیمقامێ قەزا شێخان بۆ رۆژناما ئەڤرۆ دیار كر، مە هەموو بزاڤ كرینە بەهرا شێخان بهێتە زێدەكرن و بریار ژی هات دان نوكە بەهرا شێخان دێ ب دروست گەهیت ئەگەر بهێین سەحكەینە وێستگەها سرا كێمتر لێ هاتیە وەكۆ بەرێ نەمایە.
