وێنە و خامە
غیاس خـالد زێباری
ل ڤی سەردەمی تۆڕێن جڤاكی بووینە پشكەك ژ ژیان و پێدڤیا مرۆڤی، ئەڤ تۆڕێن جڤاكی بووینە بلەزترین ئۆرگانێن راگەهاندنێ د ناڤ دەستێ مرۆڤی دا. ب راستی ژی هەبوونا وان نیعمەتەكا مەزنە چونكی پەیام و زانیاریان ب لەز دئینن و دبەن، ژ بلی چێكرن و بەردەوامیا پەیوەندیێن جڤاكی، ئەگەر مرۆڤ لایەنێ ئەرێنی بكاربینیت، چونكی لایەنێن نەرێنی ژی و خەلە بكارئینانا وان كارەساتێن مەزن درۆست دكەت.
مەبەستا من ل وێنە و خامەی بكارئینانا پۆستێن وێنەیی و نڤیسكینە ل تۆڕێن جڤاكی، ئەگەر گەریانەكێ د جیهانا تۆڕێن جڤاكیدا بكەین دێ دیار بیت كو جڤاكێ مە بەر ب جڤاكەكیا تەمبەل ڤە چوویە د وارێ خواندنێ دا، پڕانیا بكارئینەرێن تۆڕێن جڤاكی تەماشەی پۆست و بابەتێن وێنەیی دكەن چ فۆتۆ بن یان یێن لڤۆك ( ڤیدیۆ)، راستە زۆر جارا ئەو ژی د گرنگن و رامانێ ددەن لێ بابەتێن نڤیسكی سەنگ و تام و مفایەكێ زێدەتر هەیە، ب تایبەت بابەتێن زانستی و رەوشەنبیری و وێژەیی و دیرۆكی، لێ مخابن بینەر و خاندەڤانێن بابەتێن نڤیسكی هند دەمی نادەنە خوە 10 خۆلەكا بابەتەكێ گرنگێ نڤیسكی بخوونن كو بۆ هەتا هەتا مفای لێ وەربگریت، زۆر كەسێن بابەتێن نڤیسكی لایك ژی دكەن ناڤەرۆكا وی ناخوونن، لێ ئەگەر وێنەیەكێ بێ ڕامان ژی بهێتە بەڵاڤكرن ب سەدان لایك و كۆمێنت دێ بۆ چن . تاكێن خواندەڤانێن جڤاكی ب گشتی و گەنج ب تایبەت پێدڤی ب رەوشەنبیریێ نە و رەوشەنبیری ژی ب خواندنێ دابین دبیت، لەوما فەرە بۆ كلتوورێ خاندنێ ڤەگەرێین، چ خواندنا پەرتووكان بیت یان خاندنا بابەتێن مفادار ل تۆرێن جڤاكی و گرنگە گەنگەشە ژی ل سەر بهێنە كرن و بابەت بهێنە هەلسەنگاندن، باشترین رێك بۆ ب كلتۆریكرنا خاندنێ ڤەگەریانە بۆ سازیێن پەروەردەیی، ئەگەر چاوانیا ب كارئینان و مفا وەرگرتنێ تۆڕێن جڤاكی بچیتە دناڤ سیستەمێ خاندنێ دا ل قۆناغێن بنەڕەتی و ئامادەیی، ئەو گەنجێ دچیتە زانكۆیێ و پشتی ب داوی ژی دئینیت، دێ گرنگیێ دەتە بابەتێن نڤیسكی و خواندنا پەرتۆكان، ژ لایەكێ دیتر دێ كاریگەریەكا ئەرێنی ل سەر خێزانێ ژی دكەت د وارێ چاوانیا ب كارئینانا تۆڕێن جڤاكی و مفا وەرگرتنێ ژ باشیێن وێ و ب پراكتیك ببنە تۆڕێن جڤاكی نەك ئەگەرێن سەرهەلدانا ئاریشەیێن جڤاكی و بلا چاڤێن مە وێنەیان ببینن و مەژیێ مە زانیاریان كۆم بكەت.
