دەستكەڤتا كیك بۆكسینگێ و چەند تێبینیەك
ئێحسان حەسەن
ل حەفتییا بۆرێ وەكو هاتیە راگەهاندن سێ یاریزانێن كیك بۆكسینگا ئیراقێ و یانەیا ئامێدیێ ب سێ میدالییان دو یێن زێری و ئێكا زیڤی دقارەمانییا جیهانێ دا ل وەلاتێ تایلەند هاتینە خەلاتكرن، تشتێ من تێبینیكری رەنگڤەدانا خودانێن ڤان ناسناڤان بوون وەكو پێدڤی بەحس ل ئەنجامێن وان ژلایێ دەزگەهێن راگەهاندنێ نەهاتە كرن، بێ گۆمان دەستكەڤتەكا هەرە مەزنە بۆ وەرزشا ئیراقێ ب گشتی و پارێزگەها دهۆك یانەیا وان ب تایبەتی، هەرچەندە نوونەراتییا دهۆك یا لژنەیا ئۆلمپی وەكو ئەركێ وان پێشوازیا قارەمانان ب ئامادەبوونا كەس و كار وحەزژێكەرێن ڤێ یاریێ لێكر، لێ تشتێ جهێ حێبەتییێ وەكو مە ژ داخویانیێن یاریزانان زانین، هەرسێ یاریزان لسەر حسێبا خوە پشكداری یا دڤێ قارەمانییێ دا كری، ڤێ یاریێ فێدارسیونا خوە یا نشتیمانی، دیسان یا پارێزگەهێ ژی هەیە، تنێ ئەوا ئیراقێ بۆ كری ساناهیكرنا چوونا وان بوویە بۆ پشكداریێ نەزێدەتر، ئەگەر ئەم بزانین ئێك ژوان یاریزانان قارەمانێ جیهانێ عەبدلرەزاق شێخو بوو، ئەوێ بۆ سالا دویێ لدویفئێك ناسناڤێ خوە یێ جیهانێ پاراستی، لڤێرە پرسیارا هەرا گرنك ئەوە، چەوا یاریزانەكێ هەلبژارتییێ ئیراقێ بناڤێ وەلاتێ خوە بچیتە قارەمانییەكا جیهانێ بێ كو پشتەڤانییا دارایی بۆ بهێتە كرن، ئەگەر ئەم بزانین كو هەر یاریزانەك یێ بناڤێ ئیراقێ دیاریێن جودا دچنە قارەمانییان بودجەیێن تایبەت بۆ دهێنە تەرخانكرن، هندەك جاران ژی بەری قارەمانییێ كەمپێن راهێنانێ ژی بۆ دهێنە رێكخستن، ڤێجا چ یاریێن ئۆلمپی بن یان یێن نە ئۆلمپی، پرسیارا دی یا جهێ راوەستاندنێ ئەوە، بۆ پشكداریێ دقارەمانییا جیهانێ دا، مانە پێدڤییە یاریزان ژ قارەمانیێن ئەرەبی و پاشی یێن كێشوەری دەربازبن، ئانكو پشكدارییا وان لسەر چ بنەما دهێتە كرن، ئەرێ فدراسیۆنا ئیراقێ نڤێسارەك دایە یانەیا ئامێدیێ كو سێ یاریزانێن وان دێ پشكداریێ بناڤێ هەلبژارتییێ ئیراقێ دڤێ قارەمانیێ دا كەن، بەرسڤا ڤان پرسیاران تنێ فێدراسیونا ئیراقێ و یا پارێزگەهێ دڤێت بدەت، ژبەر كو نەیا ڕەوایە تۆ دەستكەڤتەكا پر بها ب قەبارێ قارەمانییا جیهانێ بینی، ئەو پووتەدانا ژ هەژی نەبیت، راستە ئەڤە یاریە یا پێنگاڤان دهاڤێژیت كو ببیتە یاریەكا ئۆلمپی، لێ پێدڤییە بودجەكا تایبەت هەبیت كو بكەڤیتە دبەرژوەندیا ڤێ یارێ دا ددەمێ پشكداریێ، دیسان بەرفرهكرنا شەنگستێ یاریێ ب تایبەت ئەگەر ئەم بزانین ژینگەها مە یا هاریكارە مە ب دەهان قارەمان نەتنێ بڤێ یاریێ بەلكو ب یاریێن دی یێن جەنگی ژی هەبن، یا من دڤێت بێژم ئەگەر ئەڤ پشكداریە یا دروست بیت، فدراسیۆنا ئیراقێ یا كونەهبارە ب هنارتنا ڤان یاریزانان بۆ هیچ هاریكاریەكێ بۆ بكەت، ئەگەر نە دڤێت رۆنكرنەكێ بدەتە رایا گشتی، یان ژی دانپێدانێ بكەت و بێژیت ئەڤە نە قارەمانییەكا فەرمی یە، ڤێجا كەس هندی وان راستییا ڤی بابەتی نوزانیت، ژبەر كو ئەوا بدەستڤە هاتی ئەگەر یا راست بیت ژ هەژی رێزگرتنێ یە.
