تێکدانا یاریگەهان و سزادانا یانەیێن مە
ئیحسان حەسەن
رەنگە هەر ئێك ژمە وەكو چاڤدێر و ڕەخنەگر و رۆژنامەڤانێن وەرزشی، هەروەسا كارگێریێن یانەیێن كوردستانێ یێن پشكدار دخولا ستێرێن ئیراقێ یا فوتبۆلێ دا پتر ژ تێبینیەكێ هەبن لسەر وان بڕیارێن ڤێ داویێ ئەوێن هاتینە دان ژلایێ لژنەیا سزادانێ ل فدراسیۆنا ئیراقێ لدۆر وان كریارێن توندوتێژیێ و ئاژاوێ ئەوێن لڤێ داویێ لیاریگەهێن نەورۆز و هەولێرێ هاتینە ئەنجامدان، بووینە ئەگەرێ هندێ كو پشتەڤانێن فوتبۆلێ بێهنە بێ باركرن ژدیتنا یاریان، دوور ژ هندێ كا ئەڤ سزایە چەند دگرانن و چەند كارتێكرنێ دێ لسەر ئەنجامێن تیمێن مە كەن، جارێ دڤێت ئەم بزانین كو ئەڤ دیاردە كارتێكرنەكا راستەوخوە لسەر ژینگەها وەرزشی ل كوردستانێ دكەت، ڤێجا هوكارێن ڤێ دیاردێ جڤاكی یان نەتەوەیی و سیاسی بن، یان ژی شاشییا دادڤانێ یاریێ و بریارەكا وی یا نەدروست بۆ نەهژمارتنا پەنەلتییەكێ یان دەرئێخستنا یاریكەركێ كاریكەر ب كارتا سۆر بن، یان ژی رەفتارێن یاریكەر و راهێنەران بن، یان ژی نەباشیا رێكخستن و برێڤەبرنا یاریان و ئاسایشا یاریگەهان بن یێن كو ب دروستی رۆلێ خوە نەرابووین و هەتا دووماهییێ، یا من دڤێت بێژم شوونا ئەم ڤان هەموو كریاران ل پشت گوه پاڤێژین، كو ئەڤە نەجارا ئێكێ یە ب تایبەتی دەمێ دوو تیمێن مە یێن كوردستانێ یاریێ دگەل ئێك دكەن، نە تنێ دخولا ئیراقێ دا، بەلكو یێن كوردستانێ ب پلێن خوەڤەژی، نها ئەم یێ هەموو ڤان وێنێن كرێت ونەشرین و نەشارستانی ژبیر دكەین، یێن كو وێنێ وەرزشا مە پیس دكەن، ژبلی هندێ گیانێ هەڤركییا وەرزشی كێم دكەت، دل رەوكییێ بۆ یاریزان و تیمان پەیدادكەت كو هەست ب ئیمناهییێ نەكەن، نها تنێ ئەم یێ بەحسێ سزایێن گران و غەدرێ دكەین، ڤێجا بەری ئەم دلگران بین ب توندیا ڤان بریاران، دڤێت ئەم چەند پرسیارا ژخوە بكەین، ئەرێ ئاژوە و كریارێن توندوتیژیێ لیاریگەهێن مە هاتینە ئەنجامدان؟ ئەرێ ئەڤ سزایە ژ ڤالاتییێ هاتینە؟ ئەرێ پشتەڤانێن فوتبۆلێ هاتینە برینداركرن و كورسیكێن یاریگەهێ هاتینە شكاندن و جەماوەر هاتنە دناڤا یاریگەهێ دا؟ چونكو ئەڤە نەجارا ئێكێ یە ئەڤ دیاردە دیاریگەهێن مەدا ژلایێ هژمارەكاجەماوەرێ نەبەپرسیارڤە دهێنە دووبارەكرن، ژبلی هندێ زیانێن مادی گەهاندینە ژێرخانەیا یانەیێ و خەرجیاتێن یانەیێن مە، كارتێكرنێ لسەر ناڤودەنگییا یاریێ و سلامەتییا جەماوەری و یاریزانان دكەت، لەوما پێدڤییە ڤەكولین لسەر ڤێ دیاردێ بهێنەكرن، رێكێن چارەسەریێ بۆ بهێنە دیتن، یا ژمن وەرە ژبۆ بەرهنگاریا ڤێ دیاردێ، یان و ئێكەتیێن وەرزشی ودەستهەلاتا نافخویی و هێزێن ئیماناهییێ ل هەرێما كوردستانێ چاڤدێریەكا باش بۆ ڤێ رەوشێ بكەن، كەسێن تێكدەر یێن كو دبنە ئەگەرێ ڤێ ئاژواێ ژیاریگەهان دوور بێخن، ژبلی هندێ دەزگەهێن مە یێن راگەهاندنێ رۆلەكێ سەرەكی بگێرن بۆ بلندكرنا رەوشەنبیریا پشتەڤانییێ ب رێكا بەرنامەیێن تایبەت، هشیاركرنا جەماوەری لدۆر گرنگییا رەفتارێ ب گیانێ وەرزشی و رێزگرتنا یاسا و رێنمایێن یاریان، ژبەر كو ئەوا نها ئەم دبینین جهێ دلگرانییەكا مەزنە.
