بەر ب ژینگەهـەكـا بـاشتر
تارق عەبدال
پرسا ژینگەهێ د سەردەمێ نوكە دا بوویە ئێك ژ بابەتێن هەر گرنگێن رۆژەڤا جیهانی، هەر وەلاتەك هەول ددەت ب رێك و شێوازێن جودا ژینگەها خۆ بپارێزیت و بەرە ب پێشڤە ببەت، ئەگەر بهێین ئاماژە ب ژینگەها كوردستانێ بدەین، كو كوردستان خودان سروشت و ژینگەهەكا گەلەكا جوان و دلڤەكەرە ژبەركو كەش و سەقایێ وێ بۆ هەر چار وەرزان یێ گونجایە كو خەلك قەست بكەتێ ل وەرزێ هاڤینێ چەندین جهێن گەشتیاری یێن ب ناڤودەنگ هەنە و ل گەل وێ چەندێ ژی چەندین جهێن كەڤنار و دیرۆكی هەنە و وەرزێن زڤستانێ ژی گەلەك دەڤەرێن كوردستانێ ژ ئەگەرێ بارینا بەفرەكا زۆر خەلك ل ناڤەراست و باشۆرێ ئیراقێ دهێنە كوردستانێ، ب دیتنا دیمەنێن جوان ئەڤ هەمی ژی دبنە ژێدەركێ ئابۆری ب خەلكێ كوردستانێ و حوكمەتا هەرێما كوردستانێ گرنگیەكا مەزن دایە بیاڤێ گەشتیاری و زەمینە خۆشكریە بۆ خودانێن ڤان جهێن گەشیتاری، ئەڤە ژی جهێ خۆش حالیێ یە و زێدەباری رێكخستنا فیستەڤالێن گەشتیاری ل كوردستانێ، بەلێ یا من مەبەست پێ د ڤێ نڤیسینێ دا ئەوە ئەز زێدەتر ئاماژە ژینگەها كوردستانێ بدەم هەر وەكی مە د سەری دا ئاماژە ب گرنگ و كەش و سەقایێ كوردستانێ كری، ل وەرزێ بهارێ پڕانیا خەلكێ كوردستانێ ژبۆ بۆراندنا دەمێن خۆش قەستكەنە ناڤ سروشتی ب مخابنی ڤە هێشتا هندەك ژخەلكێ مە فێر نەبوویە جه و ژینگەها خۆ پاڤژ راگرن زۆر بێ وژدانانە سەرەدەریێ ل گەل ژینگەهێ دكەن، بۆ نموونە وەكی پیسكرن و برینا داران هێلانا بەرمایكێن خۆ هەر چەندە ژئەگەرێ بەردەوام كو سالانە ژ لایەنێن پەیوەندیدار ڤە رێكخراوێن ژینگەهی و راگەهاندنێ و ژ ئالێ مەلایێن ئاینی و مینبەرێن مزگەفتا ڤە خەلك دهێتە هشیاركرن، بەلێ هەر هندەك هێشتا رەفتارەكا نەشایستە ل گەل ژینگەهێ دكەن، خەلك و هەڤوەلاتێن مە یێن خۆشتڤی بلا هەر ژ مە هزر بكەت، ئەو جهێ ئەم دچینێ ب مالا خۆ دابنیت كو چاوا ئەم مالا خۆ پاڤژ دكەین و چاڤێ خۆ ددەینێ، ئاها هۆسا ژینگەها خۆ ژی پاقژ راگرین دا كوردستان و ژینگەها مە هەر یا ب خەمل و جوان بیت، ژبەركو ئەڤ ژینگەه و سروشتە نعمەتەكە خودایێ مەزن دایە مە دا ئەم هەمی پێكڤە ژینگەه و سروشتێ خۆ بپارێزین هەر ئێك ژ مە بەرپرسیارە بەرانبەری پاراستن و چاڤدێری و پاڤژییا ژینگەه و سروشتێ خۆ، بلا ئێدی ئەم فێری وێ چەندێ بین نەبەس ئەركێ سازی و لایەنێن پەیوەندار و حوكمەتێ یە، بەلكو ئەرك و وەززیفێ مە هەمیانە نەبێژە من شۆلەژێ نینە یان ئەڤە نەكارێ منە بەلكو ئەركێ مە هەمیانە ئەم ژینگەها خۆ بپارێزین دا بهاڕا مە هەردەم یا ب خەمل و رەوش بیت دا ئەم هەمی پێكڤە بینە پارێزڤانێن ژینگەهێ.
