چایەکا بێ شەکر!
ئەڤە بۆ ماوەیێ دو سێ هەیڤان بوو نەسرینێ بەرنامەیەک بۆ شێوازێ خوارنا خۆ دانابوو و بڕیار دابوو هەر زوو دەست ب خوارنەکا ساخلەم بکەت و هەر ژ نوکە خۆ ژ وان خوارنان دوور بێخیت یێن کو دبیت ڕۆژەک ژ ڕۆژان دەما کو بناڤ ساڵڤە دچیت دکتور لێ قەدەغە بکەن، ئەوێ ژلایەکیڤە دڤیا سیستەمەکێ بۆ خوارنا خۆ یا ڕۆژانە بدانیت و دوور بیت ژ هەر ئێشەکێ و ژلایەکێ دیژیڤە لەشەکێ ساخلەم و ڕێک و پێک بۆ خۆ دروست بکەت، نەسرین یا دلخۆش بوو ب ئەڤی شێوازێ خوارنێ یێ بۆ خۆ دانای و دشیا کۆنترولێ لسەر حەزا خۆ یا خوارنێ بکەت داکو یا بەردەوام بیت لسەر پارێزا خۆ…
ل مێهڤانداریان، ئەڤا نەسرینێ بۆ خۆ دانای و هزر ژێ دکر هەموو دهاتە گوهۆڕین و هزرێن وێ و دلخۆشیا وێ بەر ب ئاراستەیەکێ دیڤە دچوون، ئەوێ شەڤێ ل مالەکێ مێهڤان بوون، کەیفخۆشی و سوحبەت لدووڤ سوحبەتێ.. هەموو د مژوول بوون هەتا بوویە دەمێ چایێ، دەما چا ئینای و داناین، نەسرینێ گۆت ‘بۆ من چایەکا بێ شەکر! دەما ئەڤ پەیڤە هاتییە گوهـلێ بوون، وەکی نیشانەکا پرسیارێ د سەرێ هەمو ئامادەبوویێن دیوانێ دا دروست بوو و بەرێ خۆ دانە نەسرینێ، ‘بوچی بێ شەکر!؟ ، ‘ما ئێشا شەکرێ هاتییە تە نەسرین؟، ‘مخابن هێشتا تو یا گەنجی و ئێشا شەکرێ هاتبیتە تە، نەسرینێ ب کەنیڤە بەرسڤدا، ‘مالا وە خودێ ئاڤا کری، شەکرا چ، من بتنێ شێوازێ خوارنا خۆ یا گوهارتی و من بتنێ دڤێت ساخلەم ببم، هوون ژی خۆ ژ شەکرێ دوور بێخن ما مەرجە ئێشا شەکرێ بهێتە مە ژنوی خۆ ژێ دوور کەین، دێ هەما هەر نوکە هوین ژی خۆ ژێ بپارێزن .
ڕۆژ هاتن و چوون، نەسرین بێزار بوو ژ ئەوا وێ ددیت و گوهـلێ دبوو، دناڤ نیاس و مرۆڤێن خۆدا، ئەو ما شاش کا بوچی هند تشتەکێ سەیر بوو لنک هەموویان کو چایا بێ شەکر ڤەدخۆت، ئێدی هەر مێهڤاندارییەکا چووبایێ دا بێژن، ‘بلا چایا نەسرینێ یا بێ شەکر بیت ژبەر ئێشا وێ یا شەکرێ یان دا بێژن ئەو دترسیت بکەڤیتە بەر ڤان ئێشا نزا کا دختورا چ گۆتیێ! و ئەو پرسیارێن دوبارە کو وێ گوهـ لێ دبوون، ‘پا شەکرا تە چەند بوو دووماهی جار تە گرتی؟ هاتبوو خ،ار پیچەک؟ و ئێدی یا بێهودە بوو کو بشێت ڤێ و یێ دی تێبگەهینیت کو چ ئێش ل وێ نینن، بەلکو خرابتر لێدهات و دگۆتن ئەو حەز ناکەت کەسەک ب ئێشێن وێ بزانیت و ئەو هەردەم کێماسیێن خۆ و زارۆکێن خۆ ڤەدشێریت.
و ل دوماهییا مێهڤانداریێ دەما فێقی هاتییە دانان، هەروەکی دووماهیک تێبینی بۆ نەسرینێ بهێنە دان ژلایێ نوژدارێن بسپۆر د بوارێ ساخلەمییا خوراکی دا، هەر ئێک ژ جهێ خۆ دئاخفت و شیرەت لێدکر کا کیژ جورێ فێقی بخۆت باشترە، ‹موزێ نەخۆ، ئەو ژ هەموویان شرینترە›، ‹هندی من گوهلێ بووی دبێژن سێڤا کەسک بۆ نەخۆشێن شەکرێ دەرمانە›، ‹ژخو هەما شتی و گوندۆر هەموو شەکرە، هشیار بی!›. نەسرینێ سەرێ خۆ بادا و کرە کەنی، من نەزانی پەیالەکا چایێ یا بێ شەکر بۆ ساخلەمییا من، هند سەرگێژیێ دێ بۆ من چێکەت و من نەزانی ژی دناڤ مرۆڤێن مەدا هند نوژدار و بسپۆرێن ساخلەمییێ یێن هەین!.
