ل پەرلەمانێ تورکیایێ دێ بەردەوامیێ دەینە قووناغا ئاشتیێ
سەرۆکێ پەرلەمانێ تورکیا دلخوەشیا خوە ل هەمبەر بریارا هلوەشاندنا پەکەکێ دیار دکەت و ئاماژە ب ڤێ یەکێ دکەت کو بریارا هلوەشاندنا پەکەکێ دێ کاریگەریا خوە یا گەلەک باش بۆ تورکیا و هەموو دەڤەرێ هەبیت و دێ ل پەرلەمانێ تورکیا بەردەوامیێ دەنە قووناغا ئاشتیێ.
نومان کورتولموش سەرۆکێ پەرلەمانێ تورکیا دیار کر، بریارا هلوەشاندنا پەکەکێ بێگومان بریارەک گەلەک گرنگ و دیرۆکی یە، هەموو وەلاتیێن تورکیا ئەڤرۆکە دلخوەشن و گۆت: (بریارا هلوەشاندنا پەکەکێ دێ کاریگەریا خوە یا گەلەک باش بۆ تورکیا هەبیت، بێگومان دێ کاریگەریا خوە ل سەر ئارامیا رۆژهەلاتا ناڤین ژی هەبیت و ژ بەر ڤێ یەکێ ژی نها هەموو هێز و ئالیێن سیاسی یێن تورکیا پێشوازیێ ل بریارا هلوەشاندنا پەکەکێ دکەن، نها قووناغەکا نوو ل تورکیا دەستپێکریە و دڤێت ئەم هەموو پێکڤە کار بۆ ئاشتیێ بکەین).
سەرۆکێ پەرلەمانێ تورکیا ئەو یەک ژی دیار کر، قووناغا ئاشتیێ د بەرژەوەندیا هەموو گەلێن تورکیا دایە، کورد و تورک ئەڤرۆکە دلخوەشن، چونکی ٤٧ سالن ل تورکیا شەڕەک دژوار هەبوو و گەلەک کەس بوونە قوربانی، لێ نها قووناغەکا نوو دەستپێکریە و گۆت: (نها ئەرکێ پەرلەمانێ تورکیا گەلەک زەحمەتە، چونکی ئەم دێ ل پەرلەمانی بەردەوامیێ دەینە قووناغا ئاشتیێ، گەلەک کارێن مەزن یێن قانوونی هەنە دڤێت د چارچۆڤەیێ پەرلەمانی دا بهێنە کرن، ژ بەر ڤێ یەکێ ژی دڤێت هەموو فراکسیۆنێن ل پەرلەمانێ تورکیا هەست ب بەرپرسیاریا خوە یا دیرۆکی بکەن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، ئەزموونا چەندین سالێن بۆری ئەو یەک سەلماندیە کو ب چەکی چو پرسەک ناهێتە چارەسەرکرن، ژ بەر ڤێ یەکێ ژی نها هەم پەرلەمانێ تورکیا و هەم ژی سازیێن پەیوەندیدار دڤێت ب رۆلێ خوە رابن و یا پێدڤی بۆ بەردەوامیا قووناغا ئاشتیێ بکەن و گۆت: (بەری نها ژی گەلەک جاران مە دیار کریە، ب ئاشتیێ هەموو پرسەک دێ هێتە چارەسەرکرن، لێ چەک ناهێلیت، هەکە چەک نەمینن دێ دەرگەهێ چارەسەریێ ژی ڤەبیت، هیڤیدارین ئەوا دەستپێکریە بەردەوام بیت و چەک بۆ هەتا هەتای بهێنە بێدەنگکرن دا تورکیا بشێت هەموو پرسێن هەی چارەسەر بکەت).
سەرۆکێ پەرلەمانێ تورکیا د دووماهیا ئاخڤتنا خوە دا ئەو یەک ژی دیار کر، هەلوەستێ هەموو هێزێن سیاسی یێن تورکیا ب دەستهەلات و ئۆپۆزسیۆنێ ڤە جهێ دلخوەشیێ یە، هیڤیدارین ل پەرلەمانی ژی ئەم هەموو پێکڤە کار بکەین و بەردەوامیێ بدەینە قووناغا ئاشتیێ و ب سەرکەفتنا قووناغا ئاشتیێ دێ تورکیا بهێز کەڤیت و هەموو وەلاتیێن تورکیا ژی دێ د ناڤ ئاشتیێ و ئارامیێ دا ژین و ئەو یەک داخوازیا هەموو وەلاتیێن تورکیایە.
