ئەو سێڤا د ناڤبه‌را نال و بزماران دا
سالح دۆسكی
ل بەر قراخا ڤالاتیێ
دناڤبەرا نال و بزماران دا
دو تیشكێن ڕەش ڤێكدكەڤن
هه‌ر دو ژی دزیكەرێن خەونانە
د ده‌سته‌كی ده
چه‌كووچەكە ستێران دشكینیت
د ده‌ستێ دن ده
ئامیرتەكێ دەستكردە زنجیران چێدكەت.
ئەڤ ڤالاتیا د ناڤبه‌را هه‌ر دو لێدانان ده
دگه‌ڕن سێڤه‌كێ بدەستڤەبهینن
كو ژ داره‌ك نه‌دیتی گەهشتی
نه ژبۆ تامێ یه
لێ ژ بۆ زانینێ
نه ژ بۆ رزگاریێ یه
لێ ژ بۆ ژیانێ یه.
تێكۆشینا وان نه ژ بۆ مه یه
لێ ئەم سۆته‌مه‌نینە د ئاگرێ وان ده نه.
هه‌ر لێدانه‌ك به‌شه‌كی ژ مه ژێ دكه‌ت
هه‌ر شه‌وقه‌ك خه‌ونه‌ك ژ خه‌ونێن مه ڤارێ دكەت.
ئه‌م دپرسن: ئەم كی نه؟
ما ئەم شاهدێن ڤێ بێواته‌ییێ نه؟
یان ژی دەپێ رەش و سپیێ شەترەنجێ نە؟
ئەم بێ سنوور و نە نەخشە مە هەمبێز دكەت
ته‌نێ چاڤەرێ یێن ل سه‌ر رێیه‌ك نه‌ناس دە
سێڤ، ستێر، سنوور، نەخشە، چارەنڤیس
چاڤان دخاپینن و گیانێ دشەوتینن
لێ ئەو ل ڤێرێ نینن.
ل وێرێ نینن..
و نە د جیهانا هه‌می زنجیرێن وان دەیە.
لێ دێ هێن و پەیدا بن..
نه‌مری ته‌نێ
د هەبوونا مە یا دناڤبەرا وان دایە
كاڤل و ڤەژین
د بێده‌نگیا كێلیا داوی ده
نال دێ چەمیێن
بزمار دێ ژ ژەنگاتیێ بەنە ئاخ وهەلوەریێن
ئەم تۆڤێ سێڤا چیا و ئاڤا ناڤ گەلییا
دێ ئازادیێ ب سنوور و نەخشە
كەنە كراس ل بەر خۆ كەن؛
جاران
دناڤبەرا دو هەڤدژن دە ژی
خەلاتە
ئالیێ سییێ مفادارە
و دڤێت بهێت ئەو بهارە.
