هەلسەنگاندنا شاشییان و پێنگاڤێن پێدڤی
ئیحسان حەسەن
پشتی بداوی هاتنا وەرزەكێ درێژ ژ روودان و چالاكیێن وەرزشی لسەر ئاستێ هەرێما كوردستانێ و ئیراقێ، ژبلی فوتبۆلا ئیراقێ نەبیت، ئەوا دهێتە هژمارتن درێژترین خول لسەرانسەری جیهانێ، ئەز هووسا دبینم كو باشترین پێنگاڤ ئەم دڤی ماوەیی دا پاڤێژین ئەوە، ڤەگولینێ لسەر وان هەموو شاشیان و هەلسەنگاندنەكا بەرفره بۆ هەموو بەریكانەیان ب جور و پلێن وێڤە چ ژلایێ رێكخستنێ ڤە دیسان دادڤانییێ بكەین، دیسان هەلسەنگاندنێ بۆ كارێ لژنەیا ئۆلمپی یا كوردستانێ و ئێكەتیێن یاریان و یانەیێن مە هەتا وەرزشا قوتابخانەیان و زانكویان، هەروەسا ئاستێ تیمان و یاریزان و راهێنەرێن خوە یێن خومالی و یێن دەولەتی و پشكداریێن وان لسەر ئاستێ نافخو و دەرڤە بكەین، ژبەر كو ئەگەر مە هەلسەنگاندنەكا كەتواری و دروست بۆ چالاكیێن خوە یێن سالێ كر، ئەز باوەرم دێ شێن گەهینە رێكێن چارەسەریێ یێن زانستی بۆ هەموو وان ئاریشە و كێشەیان ئەوێن دكەڤنە درێكا وەرزشا مە دا، بڤێ پێنگاڤێ ئەز باوەرم هەموو سكتەرێن وەرزشی دێ مفاداربن و دێ بزاڤان كەن كو بۆ وەرزێ بهێت باشتر و بهێزتر بهێنە دناڤا هەڤركییان دا، ب هیڤییا هندێ هەموو چینێن دناڤا وەرزشێ دا، دیسان دەزگایێن راگەهاندنێ و رەخنەگر و شرۆڤەكار دوور ژ ڤیان و رەنگێن یانەیان و تیمێن پارێزگەهان یێن جودا، پشكداربن دهەلسەنگاندنا چالاكیێن وەرزێ بوری ژبۆ بەرژوەندیا گشتی یا وەرزشا كوردستانێ، ، پاشی ل رێكێن چارەسەریێ یێن كو دبنە هاریكار ژبۆ كونترلكرنێ لسەر وان هەموو نەباشییان یێن كو دكەڤنە درێكا وەرزشێ دا پێشكێش بكەن، داكو ل وەرزێ بهێت دووبارە نەبنەڤە، تیمێن مە بهێزتر و كاریگەرتر پشكداریێ دخول و قارەمانییان دا دناڤا كوردستانێ و ئیراقێ دا دیسان لدەرڤە بكەن، بۆ ڤێ ژی و بوچوونا من، مە پێدڤی ب هندەك پێنگاڤێن بلەز هەیە، ژ گرنكترینێن وان، یا ئێكی لژنەیا ئولمپی یا كوردستانێ كار لسەر دانانا شەنكستەكێ موكم ژ پێگەهاندنا راهێنەرێن زیرەك یێن نافخویی بۆ هەموو جورێن یاریان بكەت، ژبۆ پاشەرۆژا راهێنانێ ل یانەیێن مە یێن خومالی، یا دوێ كار لسەر پێگەهاندنا نفشەكێ نوو ژ دادڤانان بكەت یێن كو بشێن سەركەڤتنا دادڤانییێ هەر چ نەبیت دقارەمانیێن نافخویی دا بینن، یا سێیێ سنورەكی بۆ ڤێ بەرلاییا كاركرنێ بدانیت، بشێت بەرنامەیێ ئێكەتیێن خوە یێن سالێ بجه بینیت و جیوازیێ دناڤبەرا چ ئێكەتییان دا نەكەت، یا چارێ هەر تیمەكا وەرزشی دچ ئاست دابیت، پێدڤییە لسەر ئارمانجێن خوە یێن پشكداریێ دیار بكەت وكار لسەر بكەت، داكو شاشیێن خوە یێن وەرزێ بوری دووبارە نەكەتە ڤە، یا پێنجێ پتر پووتە ب چالاكیێن وەرزشی یێن قوتابخانەیان و زانكویان بهێتەدان وهەموو ئاسانكاری ژبۆ سەركەڤتنا خول و قارەمانیێن وان لسەر ئاستێ پارێزگەهان دیسان هەرێمێ بهێنەكرن، لدویماهیێ ژی هیڤییا من ئەوە راگەهاندنا وەرزشی رۆلێ خوە یێ باش بینیت بۆ رەوشەنبیركرنا جەماوەرێ وەرزشی، چونكو وەرزشا كوردستانێ هەموو پیڤەرێن سەركەڤتنێ لدەڤ هەنە، لەوما پێدڤییە دەزگایێن وەرزشی هەموو شیانێن ب كار بینن بۆ هندێ ئاستەنگ و شاشیان نەهێلن، ئەگەر مە وەرزشەكا پێشكەڤتی بڤێت.
